VICELLES NANGANTI UG KNOCK-OUT

Ronnie Mark "MakMak" Vicelles

Share this on Social Media

CEBU CITY, PHILIPPINES- Nanganti ug knock-out win si Ronnie Mark “MakMak” Vicelles (10-0-1-5KOs) batok sa beterano nga si Jesse “Little Giant” Espinas (19-3-11KOs) sa ilang engkwentro karung Sabado alang sa World Boxing Association (WBA) Asia South light flyweight Championship.

“Lig-on pud ang akong kontra Sir pero ug makita nako nga ma-knock out siya, i-knock out gyud nako” matud pa sa 22-anyos nga ni Vicelles dihang nahinabi exclusive sa Inews.Ph niadtong Myerkules sa Omega Boxing Club gym sa IPI compound sa Mabolo. Gisugilon ni Vicelles nga nangamdam siya ug maayo sa maong sangka batok sa taga Oroquieta City nga si Espinas sanglit kini ang katumanan sa iyang pangandoy nga mahimong kampyon nga boksidor.

 

Kung mahimo siyang kampyon, kini ang mahimong taytayan nga matabangan niya ang iyang pamilya nga atua sa Lebak, Sultan Kudarat. Si Vicelles misugilon nga dako kaayo ang iyang paglaum sanglit epektibo alang kaniya ang training program nga gipatuman ni head coach Julius Erving “Jinggoy” Junco. “Plano nako nga madaug gid, grabe ang akong paningkamot ani nga training, tanan tanan nga program ni Coach (Junco) ako gyud gikat-unan tanan.

Chance ni nako nga mag champion karun. Ang ako ani kung ma champion ko, makatabang ko sa akong pamilya.” Gitug-an niya nga gikuhaan usab niya sa iyang estilo ang iyang mga idolo nga parehas niya mga walhon (southpaw) nga mga boksidor nga si WBA welterweight champion Manny Pacquiao ug WBA Super lightweight ug WBO lightweight champion Vasyl Lomachenko. Si Vicelles kinsa ulitawo ug kamagwangan sa upat ka mga anak mao ang kasamtangan nga Visayas Professional Boxing Association (VISPROBA) light-flyweight champion human siya mudaug batok ni Robert Onggocan niadtong Abril 5, 2019 sa Parkmall Piazza Rotunda sa Dakbayan sa Mandaue.

 

 

 

Sa dili pa ang championship fight ni Vicelles, mu-away usab si Tomjone “Wardog” Mangubat batok ni Joffrey Garcia alang sa usa ka tune up fight. Si Mangubat maoy main event niadtong Kumbati 2 sa Parkmall apan napakyas sa iyang tinguha nga mahimong World Boxing Council (WBC) Asia Silver featherweight champion batok ni Arnel Baconaje. Masaligon hinoon ang top management sa Omega Pro-Sports International (OPSI) kinsa mao ang nagdumala sa Omega Boxing Club nga makabangon pa si Mangubat sa propesyon niini sanglit 21 anyos pa ang maong boksidor ug kugihan kini nga mu-ensayo ug disiplinado.

Si OPSI Vice Pres. Jerome Calatrava mibutyag nga mangunay sa pag-superbisar sa maong promosyon si Games and Amusement Board (GAB) Chairman Abraham Khalil “Baham” Mitra. Ang #Kumbati 3 sa Liloan nga ubos sa promosyon sa Omega Sports sa International Pharmaceuticals Inc. (IPI) adto ipahigayun sa Panphil Frasco Memorial Gymnasium sa lungsod sa Liloan.

Sugdan ang mga duwa sa alas 5:00 ang takna sa hapon diin mismo si Liloan Mayor Christina Garcia-Frasco ug bana niini nga si Cong. Duke Frasco (Cebu Province, 5th district) kusganon kaayo ang suporta alang sa maong promosyon./AAJ

 

Leave a Reply

Your email address will not be published. Required fields are marked *