AHONG GUSTONG WAD-ON ANG CALLING FEE SA MGA TRABAHANTE SA OPON, KOTONG ENFORCERS PAPHAON

Share this on Social Media

LAPU-LAPU CITY, PHILIPPINES- Gusto nang wad-on ni Lapu-Lapu City Mayor Junard “Ahong” Chan ang calling fee ngadto sa libuan ka mga trabahante sa Mactan Economic Zone (MEZ). Kini maoy usa sa mga pamahayag ni Chan sa iyang inaugural message kagahapon, Hulyo 5, sa gipahigayun nga inaugural session sa mga sakop sa 15th Sangguniang Panlungsod (city council) sa syudad ubos sa pag-preside ni Bise Mayor Celedonio Sitoy.

Gihulagway ni Chan nga “anti-poor” ang calling fee busa iyang giawhag ang mga sakop sa konseho nga kini wad-on. “I appeal to the wisdom of the members of this 15th Sanggunian to review the law on “calling fee”, and eventually repeal the same as this is anti-poor and unnecessary.” Ang calling fee gipatuman ubos sa administrasyon ni kanhi Mayor Paz Radaza kinsa mao na karun ang Congresswoman sa syudad. Wala hinoon gipaklaro ni Chan kun apil ba usab nga iyang ipawala ang “occupational permit fees” ngadto sa mga non-daily wage earners sa syudad nga nagtrabaho gawas sa MEZ.

Kun ugaling mawala ang calling fee, dili na unya ma-deduct sa sweldo sa gibana-bana nga 100,000 ka mga trabahante sa MEZ ang tag P100 matag tuig nga ilang gibayad ngadto sa lokal nga kagamhanan. Segun sa ordinansa ang mga employers/locators sa MEZ kun diin empleyado ang nahitungdan ang mutingob ug bayad ngadto sa city hall hinungdan nga dunay deduction sa sweldo. Lakip usab sa gustong wad-on ni Chan ang ordinansa kabahin sa mandatory ID system sa mga tricycle drivers sa syudad samtang misaad sab siya nga wad-ong ang mga kurakot nga (traffic) enforcers nga iyang gitawag ug “Kotong enforcers.”

“We will likewise rid our streets with “Kotong enforcers” and impose traffic laws fairly and squarely with no exceptions.” Lakip ang mao niyang mga tinguha sa 10-point programs nga gustong ipatuman ni Chan ubos sa iyang administrasyon. Ang mga mahinungdanon nga bahin maglakip sa katukuran ug “Community College” sa isla sa Olango ingon man ang pagpadagan sa Lapu-Lapu Mini City Hall sa isla.

Mibutyag ang Mayor nga mupahigayun usab siya ug “regular people’s day” gawas sa city hall arun nga mahibaw-an ang mga yangungo sa katawhan. Kalabot sa suliran sa ginadiling drugas, tukuron sa Mayor ang Lapu-Lapu City Office for Substance Abuse and Prevention (LOSAP) ingon man ang pagtukod ug drug rehab facility sa Olango. Sa health, misaad si Chan nga mupalit ug mga bag-ong ekipo alang sa Lapu-Lapu City Hospital ug sa Sta. Rosa Community Hospital.

Iya usab nga butangan ug 24/7 help desks ang tanang tourism landmarks sa syudad samtang utingkayon sab niya ang mga transaksyon sa niaging administrasyon agig tipik sa iyang kampanya batok sa korapsyon. Mideklarar usab si Chan nga wad-on ang mga “fixers” dungan sa saad nga wad-on ang red tape sa city hall. “No more fixers. Let this serve as a stern warning to all the fixers, “you are not welcome in Lapu-Lapu City Hall.” Anybody found violating this order will be dealt with accordingly.

“Giawhag ni Chan ang mga sakop sa konseho kun diin mayoriya niini naa sa oposisyon nga wad-on na ang pamolitika alang sa kaayuhan sa katawhan. “Let us set aside the divisive politics and together we row in one direction, towards change, towards a new and better Lapu-Lapu,” tipik sa pamahayag ni Mayor Chan. Gawas ni Bise Mayor Sitoy, duha ra ka sakop sa konseho ang alyado ni Mayor Chan, sila si Konsehal Nelson Yap ug Jan Vincent Dela Serna. Ang napulo gawas pa sa mga ex-officio members nga sila si ABC Pres. Eduardo Cuizon ug SK Federation Pres. Laika Tampus naa habig sa oposisyon./AAJ

 

Leave a Reply

Your email address will not be published. Required fields are marked *