CHAN MIPATUMAN UG LOCKDOWN POLICY SA CITY HALL, STAFF SA GIBANGIAN NGA CONGRESSIONAL OFFICE NAMAULI NA

Si Mayor Ahong Chan dihang nahinabi sa media gawas sa congressional office ni Cong. Paz Radaza

Share this on Social Media

 LAPU–LAPU CITY, PHILIPPINES- Wala nay mga tawo ang sulod sa opisina ni Lapu-Lapu City Congresswoman Paz Radaza nga anaa sa city hall. Kini human nga mipatuman ug “locked down policy” si Mayor Junard “Ahong” Chan sukad kagahapong adlawa, Hulyo 5, 2019.

Ang lock down hingpit nga nakatapos sa suliran kalabot sa pagtinir sa mga staff ni Cong. Radaza sulod sa congressional office human nga sa sayo pa misuwat si Chan ngadto sa kongresista ug NOTICE TO VACATE CITY HALL PREMISES niadtong Hulyo 1. Si Cong.Radaza pinaagi sa iyang abugado nga si Atty. Kim Castro nagkanayon nga dili makapahawa si Mayor Chan ngadto ni Radaza ug sa iyahang nga staff sanglit dunay ordinansa ang syudad ( Ordinance No. 14-200-2019) labot sa pag-gamit sa maong opisina apan si Mayor Chan mihatag ug 24 oras nga tagal ngadto ni Radaza nga i-bakante ang opisina.

“You are hereby notified that the Office of the Mayor shall use the premises currently assigned as office space for the House of Representatives within the Lapu-Lapu City Hall. Further, you are hereby directed to vacate the premises within 24 hours from receipt of this notice,” ang suwat ni Chan miingon.

Wala makatandog sa mga staff ni Radaza ang maong 24 hour deadline apan ang lockdown policy nakapugos nila sa pagpamauli sukad pa kagabii, Byernes. “With this, Congresswoman Paz Radaza’s staffs went home tonight following Mayor Ahong Chan’s order. Thus, no staffs left at the Congressional Office at exactly 10:30pm of July 5th,” segun pa sa statement sa mga staff ni Cong. Radaza.

Ang lock down policy ni Mayor Chan masugod sa alas 6:00 sa gabii hangtud sa alas 6:00 sa buntag. “Nobody is allowed to enter the city hall premises from 6:00pm to 6:00am unless there is authority from the Mayor,” segun sa Memorandum -052 ni Chan nga nagpatuman sa maong lock down policy Gidid-an usab ang pagsulod sa city hall sa adlaw nga walay trabaho ug holiday pwera lang kun dunay pagtugot gikan sa Mayor.

Wala hinoon gilakip sa lock down policy ang mga sakop sa Nerve Command Center nga nag-operate 24/7 apan kinahanglan nga mu-log book ang mga on-duty nga personahe niini. Si Chan midaug batok sa bana ni Radaza nga si kanhi Congressman Arturo Radaza sa miaging eleksyon apan misang-at kini ug protesta sa Commission on Elections (Comelec) batok ni Chan.

Ang mga Radaza ug si Chan magkauban kanhi sa politika apan nagkabuwag sukad niadtong 2010 sa dihang miatbang si Chan ngadto ni Cong. Radaza sa mayoralty election niadtong tuiga./AAJ

 

 

Leave a Reply

Your email address will not be published. Required fields are marked *