VICELLES MAS BUG-AT SA KONTRA ALANG SA WBA ASIA SOUTH LIGHTFLY BELT

Share this on Social Media

CEBU CITY, PHILIPPINES Mas bug-at batok sa iyang kontra si Ronnie Mark “Makmak” Vicelles alang sa WBA Asia South light flyweight championship ugmang adlawa sa Liloan. Sa official weigh in nga gipahigayun sa Manggahan resto bar sa Lahug, mitimbang si Vicelles ug 107.7 samtang si Jesse Espinas miabot ug 105.8 alang sa 108 lbs weight limit.

Si Vicelles (10-0-1, 5KOs) masaligon nga mudaug samtang si Espinas (19-3-0, 11KOs) miingon nga sakto usab ang iyang preparasyon. Nanganti nang daan si Vicelles nga iyang tumbahon si Espinas sa ilang 10 rounds nga championship fight nga gipaabot nga dugukan sa katawhan.

Gitug-an ni Omega boxing head coach Julius Erving Junco nga miabot ug 10 ka semana ang ilang ensayo alang sa maong sangka nga mubutang na unya ni Vicelles sa world rankings kun kini mudaug. Ang duwa adto ipahigayun ugma sa alas 7 sa gabii sa Panphil Frasco Memorial gym sa nahisgutang munisipyo sa Liloan.

Ubos sa Omega Pro-Sports International (OPSI) nga gipangulohan ni Pio Paulo Castillo sa Intl. Pharmateuticals Inc. (IPI) ang maong1 promosyon sa duwa nga #KUMBATI 3 sa Liloan. Sa supporting bout si Joyjoy Formentera (11-3-0, 6KOs) mitimbang ug 114.5 samtang si Andro Bello Laurio (10-2-1, 7KO’s) miabot ug 115.8 alang sa usa ka 10 rounds non-title bout.

Ang batan-on nga si Tomjone “Wardog” Mangubat (10-11, 9KOs) mitimbang ug 127.1 batok ni Joffrey Garcia (6-10-4, 5KOs) 126.2 alang sa usa ka 8 rounder fight. Mutambong sa maong duwa si GAB Chairman Baham Mitra./AAJ

 

 

Leave a Reply

Your email address will not be published. Required fields are marked *