AHONG NANGDANI UG P15 MILYONES ARUN MGA KONSEHAL MUBALI

Share this on Social Media

LAPU-LAPU CITY- Nangdani matud pa si Mayor Junard “Ahong” Chan ug P15 MILYONES PESOS ngadto sa mga sakop sa oposisyon sa konseho sa syudad arun nga mubali na kini ngadto kaniya. “Sky is the limit ang offer, fifteen million district fund,” matud pa sa usa ka konsehal nga sakop sa Team Deretso, ang opposition bloc sa konseho sa dihang nahinabi sa iNews.Ph.

Ang konsehal kinsa tuyo nga gitago lang ang pangalan midugang nga gawas sa maong pundong salapi, mitanyag usab si Chan ug quota nga maka-hire ang mga konsehal nga mubali alang sa job order (J.O.) ug contractual nga emplyedo lakip na gani ang rekomendasyon sa himuon nga regular nga kawani sa city hall.

“Including J.Os., contractual and even regular employees, it is a tempting offer,” ang maong konsehal sa syudad midugang. Wala pa dayun makuha ang reaksyon ni Mayor Chan kalabot niini apan sa iyang pamahayag sa inaugural session sa konseho niadtong byernes, miawhag ang mayor ngadto sa mga konsehal nga maghiusa na sila ug kalimtan ang politika.

“Let us set aside the divisive politics and together we row in one direction, towards change, towards a new and better Lapu-Lapu,” tipik sa pamahayag ni Mayor Chan sa maong inaugural session. Importante nga makuha ni Chan ang mayoriya sa konseho sanglit kini ang yawe arun nga iyang mapatuman ang mga programa ug proyekto sa syudad.

Gawas ni Bise Mayor Celedonio Sitoy, duha ra ang kaalyado ni Chan sa konseho, sila si Konsehal Janvi dela Serna ug Nelson Yap. Ang mga sakop sa Team Deretso maglakip nila ni Konsehal Marcial Ycong, Rico Amores, Efren Herrera, Rex Mangubat, Gregorio Paquibot, Flaviano Hiyas, Alexander Gestopa, Quennie Malingin-Amman, Rodolfo Potot ug Jose Dungog ingon man ang mga ex-officio members nga sila si ABC Pres. Eduardo Cuizon ug SK Federation Pres. Laika Tampus./AAJ

 

 

 

 

 

 

Leave a Reply

Your email address will not be published. Required fields are marked *