MGA ALYADO NI CHAN WALAY KOMITIBA SA KONSEHO, PROGRAMA NI CHAN SA LAPU-LAPU NAMILEGRO

Recess sa Lapu-Lapu City council (iNews.Ph file photo)

Share this on Social Media

LAPU-LAPU CITY- Walay bisan usa ka komitiba sa konseho ning maong syudad ang duha ka alyado ni Mayor Junard “Ahong” Chan. Si Konsehal Nelson Yap wala gyuy komitiba kay bisan na lang ug membership wala gyud kini mudawat. Si Yap kinsa abogado mibalibad usab sa dihang gi-nominar kini nga mahimong Chairman sa Committee on Drug Abuse and Drug Trafficking.

Hinoon si Konsehal Janvi dela Serna sakop sa Committee on Tourism apan mao ra usab kini ug tanang mga komitiba pulos na gihuptan sa mayoriya nga sakop sa oposisyon. Sa sayo pa giangkon ni Chan nga mitanyag siya ug district fund sa konsehal nga mukuyog kaniya apan wala kini makadani sa mga sakop sa Team Deretso, ang politikanhong pundok ni Cong. Paz Radaza ug sa bana niini nga si kanhi kongresista ug mayor nga si Arturo.

Si Chan nagkanayon nga mahinungdanon ang suporta sa mga konsehal apan niining maong kalambuan nabutang sa sitwasyon nga dili niya mapatuman ang iyang mga programa. Wala hinoon mubutyag si Mayor Chan sa tukmang kantidad sa district fund nga iyang gitanyag nga nahisama ug “pork barrel” diin ang mga konsehal mahimong maka-identify ug mga proyekto ug mga programa nga hatagan ug pundo sa kagamhanang lokal.

Matud pa ni Chan nga dili siya gusto nga mahitabo sa mga konsehal ang iyang kasinatian kaniadto nga wala siya mahatagi ug district fund dihang nahimo siyang independent councilor ug wala na muuban sa mga Radaza. “Ako sa akong pang gobyerno transparency ko. Transparent ko ang ako lang ako nang gibutyag ngadto sa mga konsehal nga kung unsa atung buhaton, unsa atung proyekto sa atuang syudad pahibaw-on nato ang mga katawhan kung unsa man ang akong ihatag ninyo magpahibawo ko sa mga tawo sab,” matud pa ni Chan human niya angkona nga nitanyag siya ug district fund sa mga konsehal sa dihang nahinabi sa mga tigbalita.

Dunay konsehal nga mitug-an nga 15 milyones pesos ang gitanyag nga district fund ngadto kanila apan wa muklaro si Chan kun pila kini apan misugilon nga “milyon” gyud ang kantidad niini. Sanglit walay nidawat sa mao niyang tanyag ug walay nibalitok nga konsehal ngadto kaniya, wala gyuy nahuptan nga committee chairmanships sila si Yap ug Dela Serna. Ang gamhanan nga Committee on Finance and Appropriations nahuptan ni Konsehal Flaviano Hiyas samtang ang Committee on Infrastructure, Public Works, Urban Planning and Housing nakuha ni Konsehal Eduardo Cuizon.

Ang ubang committee chairmanships mao ang mga musunod: Education, Culture, Heritage and Historical Affairs (Kon. Cuizon); Health and Hospital Services (Kon. Alexander Gestopa); Laws and Human Rights (Kon. Gregorio Paquibot); Markets and Consumer Protection (Kon. Ricardo Amores); Abbatoir (Kon. Amores); Environment and Natural Resources (Kon. Amores); Tourism (Kon. Quennie Malingin-Amman); Barangay Affairs (Kon. Cuizon); Cooperatives and Livelihood (Kon. Jose Dungog); Youth Devt. (Kon. Laika Tampus); Sports Devt. (Kon. Rex Mangubat); Urban Poor, Cultural Minorities and Social Welfare (Kon. Rodolfo Potot); Children and Family Relations (Kon. Amman); Human Resources Devt.(Kon. Paquibot); Business and Industry, Energy and Power (Kon. Mangubat); Accreditation (Kon. Dungog); Ethics, Good Govt., Transparency and Accountability (Kon. Marcial Ycong); Transportation and Communication (Kon. Potot); Games and Amusements (Kon. Amores); Social Services and Senior Citizens (Kon. Ycong); Drug Abuse and Drug Trafficking (Kon. Cuizon); Police, Penology, Fire and Civil-Military Operations (Kon. Amores); Foreign Relations (Kon. Efren Herrera); Labor and Employment (Kon. Dungog).

Sa 12 ka mga elected councilors, 10 ang sakop sa Team Deretso samtang 2 ra ang sa habig ni Mayor Chan. Hinoon alyado ni Chan si Bise Mayor Celedonio Sitoy apan makabotar lamang kini kun dunay panagtabla sa botasyon sa konseho sanglit ang iyang ginhuhaton gawas nga ikaduhang taas nga opisyal sa syudad mao ra ang ang pag-preside sa session.

Si Cuizon ug Tampus mga ex-officio members, si Cuizon mao ang Presidente sa Association of Barangay Councils (ABC) samtang si Tampus mao ang Sangguniang Kabataan (SK) Federation President./AAJ

Leave a Reply

Your email address will not be published. Required fields are marked *