AHONG NGADTO SA KAPOLISAN SA OPON,” “AYAW KO NINYO PAKYAS”

LAPU-LAPU CITY, PHILIPPINES- “Ayaw ko ninyo pakyasa.”

Kini maoy kusganong pamahayag ni Lapu-Lapu City Mayor Junard “Ahong” Chan human sa pag-asumir sa kaganihang hapon, Hulyo 15, 2019, sa bagong hepe sa Lapu-Lapu City Police Office Col. Clarito Baja.

Si Chan midayeg sa nahimong mga accomplishments sa gipulihan ni Baja nga si Col. Limuel Obon kinsa iyang gihulagway nga “sterling performance” ug ngadto ni Baja mipasalig siya ug suporta apan kinahanglan nga maningkamot gyud sa hingpit ang kapolisan arun mahimo nga”crime free” ang syudad.

“To Colonel Baja you have my full trust and confidence. My administration is fully supportive of the Lapu-Lapu City Police Office. As I mentioned during my speech in the inaugural session , my administration wil extend assistance to your office, financial or otherwise. However I only have one challenge for you, that is to make Lapu- Lapu City a crime free city.”

Si Chan miawhag sa kapolisan nga ipatuman gyud sa hingpit ang balaud nga way pagpinig sa bisan kinsa samtang iyang gipangayo ang ilang commitment arun nga mahimong hapsay ug luwas nga kapuy-an ang syudad sa mga mulopyo, mga negosyante ug mga turista.

“Akong hagit sa tanang PNP personnel nga nadestino diri sa Dakbayan sa Lapu-Lapu nga ipatuman ang balaud regardless ug kinsa ang makasupak niini. As I reportedly say, there are no sacred cows in my administration. I expect no less from you, the men and women in uniform, ayawg hugawi ang inyong uniporme. I demand your hundred percent commitment towards making All Oponganons, tourists and investors safe and secure.”

Tulo ka mga nag-unang kampanya ang gusto ni Mayor Chan, pakigbatok sa ginadiling drugas agi ug suporta sa kampanya ni Presidente Rodrigo Duterte, pagsumpo sa illegal nga sugal ug ang illegal nga panagat.

Samtang miubos ang crime rate sa syudad, si Obon nahimong unod sa mga balita sa miaging mga buwan human nga nasulbad sa LCPO ang Christine Lee Silawan murder case, kadtong 17-anyos nga kolektor ug amot sa simbahan nga gilaplap ang nawong gawas pa nga gidunggab siya sa makadaghan sa self-confessed nga mamumuno nga si Renato Llenes.

Si Baja sa dihang nahinabi sa mga tigbalita agi ug iyang reaksyon midawat sa hagit ni Chan apan siya miawhag sa katawhan nga makigtambayayong usab sa kapolisan.

Iyang paningkamutan nga matupngan ang gipakita nga performance ni Col. Obon.

“Actually this is a big challenge tungod sa accomplishment sa akong gipulihan, akong paningkamutan nga matupngan o malabwan pa nako kay mao man na ang gipangita sa atung katawhan. So I encourage the Oponganon nga dili makaya kanako ug sa kapolisan kun walay pagtinabangay sa tanang katawhan. Crime prevention, the fight against crime is everybody’s concern.”

Nagbayluay ra sila ug pwesto ni Obon sa PRO7 headquarters sa Regional Learning and Doctrine Development Division (R8).

Si Baja kinsa sakop sa Philippine National Police Academy (PNPA) 1991 Tagapagkalinga class mao sab kanhi ang Provincial Police Director sa Siquijor.

Ang nangulo sa turn-over of command mao mismo si Police Regional Office (PRO7) Regional Director Brig. General Debold Sinas kinsa sa sayo pa mipahigayun usab ug turn-over sa Mandaue City Police Office (MCPO).

Pormal nang milingkod isip hepe sa MCPO si Col. Jonathan Abella hulip ni Col. Julian Entoma.

Si Abella nagbayluay usab sa pwesto diin si Entoma mao ang mipuli isip hepe sa Regional Personnel and Records Management Division (R1).

Gawas kang Mayor Chan didto sab sa turn-over sa LCPO sa Lapu-Lapu Sports Complex si Bise Mayor Celedonio Sitoy ug mga city councilors nga sila si Janvi dela Serna, Efren Herrera ug Gregorio Paquibot./AAJ