TABANG PINANSYAL ANDAM NA SA MGA NAMATAY UG NAANGOL SA DISGRASYA SA BOLJOON, LUNGSOD MOPALIT UG AMBULANSYA HUMAN BAWI-A SA KAPITOLYO

Tabang pinansyal giandam na sa kagamhanan sa lungsod sa Boljoon alang sa mga kabanay sa siyam nga namatay ug sa di mominos baynte nga naangol human moligid ug mahagbong sa bungtod ang mini dump truck nga giluwanan sa mga biktima sa may Sitio Lingatong, Barangay Lower Becerril, bukirang bahin sa nahisgutang lungsod mga pasado alas siete sa buntag (July 19, 2019).

Sagad sa nangamatay ug naangol mga estudyante sa Nangka ug San Antonio Elementary School nga paingon unta nga mosalmot sa District Nutrition and Cultural Sports Meet nga gipahigayon sa lungsod. Nasayran nga nasangunan ang mini dump truck nga gimaniho ni Danilo Niere nga maoy mikuha sa mga estudyante aron makasalmot sa kalihukan sa eskwelahan sanglit layo man ang nahimutangan sa tunghaan nga di mominos mga 20 kilometros ang gilay-on gikan sa lungsod, apan wa damha nga mahitabo ang disgrasya.

Si Boljoon Mayor Merlou Derama nga nahinabi sa iNews.Ph samtang giduaw niini ang mga kabanay sa mga namatay didto sa Greenland Memorial Homes, nagkanayon nga tag-baynte mil pesos sa matag banay nga namatyan ang ilang itunol nga financial assistance.

Samtang si Boljoon Vice Mayor Ervin Villanueva nga maoy nag-atiman sa mga namatyan didto sa punerarya mipahibawo sa Inews.Ph nga dies mil pesos ang serbisyo sa funeral parlor, “ Ang dies mil pesos bayad sa punerarya ug ang sobra nga dies mil adto sa pamilya sa namatay”, pagpasabut pa ni Villanueva.

GIBAWI ANG AMBULASYA?

Nasayran nga mga ambulansya na sa silingang mga lungsod ang miresponde sa aksidente sanglit gibawi dili palang dugay sa kapitolyo ang ambulansya sa lungsod, “Gikuha sa province, kay ilang ipagamit sa ubang district,” dason pa ni Boljoon Mayor Merlou Derama.

Sa pangutana kung unsa ang gamiton nila panahon sa emergency, “Wa na gyud mi ambulansya gyud, mao nga nagbudget ko karon para mamalit ko ug bag-ong ambulansya nga naa gyud mi permanenting amoa na gyud’” sigon pa sa mayor.

Kung may mga emergency sa lungsod ang sakyanan lang una sa Municipal Disaster Risk Reduction and Management Office ang ilang gamiton. Nangayo na usab ug tabang si Mayor Derama sa buhatan ni Presidential Assistant for the Visayas Secretary Michael Dino aron matabangan ang mga biktima sa nahisgutang insidente.

HUBOG ANG DRIVER?

Dihang paingon palang ang sakyanan sa eskwelahan, kusog kaayo ni nga nakapadagan, gani sigon pa ni George Gulay nga nagpuyo duol sa eskwelahan nga hapit siya madasmagi sa mini dump truck, “Pwerting kusoga niya, paglingi nako misigsag man, mao to nga miambak ko’s kanal, mora’g mi-jump siya didto sa imburnal ba, paingon pa to kuha sa mga estudyante,” asoy pa ni Gulay.

Ang kapolisan padayon pa sa ilang pakisusi kung hubog ba gyud ang driver nga si Danilo Niere kinsa nagpaalim pa sa Oslob District Hospital, hinoon ubos na kini sa kustodiya sa kapolisan. Giawhag nila ang kabanay sa mga biktima sa pagpasaka ug kaso batok sa driver aron mapasaka nila ang kasong reckless imprudence resulting to multiple homicide and physical injuries.

 

Mayor Merlou Derama nga nakighinabi sa kabanay sa mga biktima

 

Mga kabanay sa mga biktima