HUMAN ERROR POSIBLENG HINUNGDAN SA DISGRASYA SA BOLJOON NGA MIKALAS SA 9 KA MGA TAWO

Share this on Social Media

CEBU CITY, PHILIPPINES- Posibleng “human error” ug dili pagkawagtang sa brake sa mini dump truck nga nadisgrasya kagahapon sa buntag didto sa Boljoon ang hinungdan sa hitabo.

Kini mitumaw human nga mismo si Boljoon Vice Mayor Ervin Villanueva mibutyag nga maayo ang kondisyon sa maong Foton mini-dump truck (KVS 242) nga gimaneho ni Danilo Niere, empleyado sa municipio, nga maoy mikuha sa mga biktima gamit ang maong sakyanan nga gipanag-iya sa Boljoon LGU.

“Ensakto tanan, sakto tanan ang among mga sakyanan diha, saktog check-up, change oil, sakto tanan,” sumala ni Villanueva dihang nahinabi exclusive sa Inews.Ph didto sa lokal nga punerarya diin gi-embalsama ang tanang siyam (9) ka mga biktima nga sagad mga elementary pupils.

Si Niere gipanalipdan usab hinoon ni Villanueva nga nangatarungan nga nawad-an ug brake ang sakyanan apan kun maayo ug kondisyon sa mini- dump truck katingalahan nga kini mawad-an ug brake. “Ang atung driver karaan gyud tung driver naniguro gyud tu siya.

Ang amo pung service bag-o so atlan lang gyud. Naatlan lang gyud nga sa pagdulhog nawad-an gyud siyag brake pero ang among sakyanan bag-o,” dugang nga pamahayag ni Villanueva. Si Mayor Merlou Derama sa iyang bahin mibutyag nga gusto gyud niya nga mahibaw-an ang tinud-anay nga hinungdan busa iya gyud nga pakigsultian mismo ang driver.

Sa oras ning pagbalita wala pa maistorya ni Derama ang driver nga si Niere tungod kay nagpaalim sab kini sa iyang mga injuries nga naangkon sa Oslob District Hospital. Ang mga biktima segun sa Boljoon police mao sila si Mary Ann Filipino, 12; Janna delos Santos, 11; Jerome Niere, 11; Clint Isidore Dugang, 10; Jefferson Jorfo, 11; Mark.Lloyd Mosqueda, 12 ug ang mga hingkod nga sila si Victoria Gorozon ,40 ug Alexander Villanueva, 20.

Segun sa inisyal nga inbestigasyon sa kapolisan daghan ug sakay (fully-loaded) ang maong mini dump truck gani duna pay laing 16 sa mga pasahero niini ang nanga-angol nga gipangdala sa mga tambalanan.

Ang driver nga si Niere kinsa gipabantayan ni Mayor Derama ug pulis nangataruran nga nawad-an ug brake ang sakyanan hinungdan nga nahulog kini sa bung-aw sa dihang nagdulhog na sila sa Sitio Lingatong, Barangay Lower Becerril pasado alas 7:00 ang takna sa buntag.

Gisusi karun sa kapolisan ang anggulo nga wala mapugngi ni Niere nga mahulog ang mini-dump truck tungod kay kusog ang dagan sa maong truck samtang kini nagdulhog. Ang mga batang biktima mga estudyante sa Nangka Elementary School ug San Antonio Elementary School nga nahimutang ra usab sa Barangay Nangka ug San Antonio ug paingon unta sa Poblacion, Boljoon arun sa pagsalmot sa gikatakda nga district meet.

Ang duha ka mga hingkod nga nakalas nikuyog nga ginikanan ngadto sa lain usab nga mga nangaangol sa maong aksidente. Matud pa ni Bise Mayor Villanueva nga lisud ang sakyanan sa maong dapit nga kapin sa 20 kilometros ang gilay-on sa Poblacion hinungdan nga mi-request kanila ang mga school officials sa duha ka mga eskwelahan nga kuhaon ug sakyanan sa municipio ang mga nahingtungdan./AAJ

 

Leave a Reply

Your email address will not be published. Required fields are marked *