BARANGAY KAPITAN SA AYUNGON NAGHIKOG HUMAN GITUMBOK NGA RESPONSABLE SA AMBUSH

Si anhing Mabato Brgy. Capt. Sunny Caldera (NOPPO photos)

CEBU CITY, PHILIPPINES- Naghunos sa iyang kaugalingong kinabuhi kadtong Barangay Kapitan nga nahilambigit sa pagkamatay sa upat ka mga polis nga gi-ambush didto sa Ayungon, Negros Oriental sa miaging semana.

Si Barangay Kapitan Sunny Caldera, 51, sa Brgy. Mabato, Ayungon mao ang naghikog matud pa sa report nga nahidangat sa Police Regional Office (PRO7). Si Caldera gisukit-sukit sa maong hitabo apan bisan pa ug wa mamatud-i ang iyang kalambigitan miyarok na hinoon kini ug “pesticide” matud ni Negros Oriental Police Provincial Office (NOPPO) Director Col. Raul Tacaca.

Namatay si Caldera sa Bindoy District Hospital kagahapon diin didto siya dad-a human siya miinom sa kemikal para sa tanom niadtong Lunes. Tungod sa iyang kamatayon wala na siya apila sa kasong multiple murder ug theft nga gipasaka sa NOPPO gumikan sa kamatayon nila ni Corporal Relebert Beronio; Patrolman Raffy Callo; Patrolman Roel Cabellon ug Patrolman Marquino de Leon, mga intel officers sa 704th Mobile Force Company sa Regional Mobile Force Batallion (RMFB7).

Numero uno sa gikiha ang giingong maoy kontak sa mga gipatay nga police nga mao si Victoriano Anadon, Jr. kinsa gilakip sa mga suspetsadong New Peoples Army (NPA) nga mao ang mga musunod; Jonathan Baldivino (At large); Rengie Anadon Baluhabo (At large); Gelie Anadon Ebedo (At large); Joseph Torres Ogates (At large); Jelly Anadon Ebedo (At large) ug lain pa nga mga John Does ug Jane Does.

Giklaro sab ni Gen. Sinas nga ang mga polis nakasulod didto sa balay ni Anadon ug dayung miabot ang mga armado. Gipanghigtan pa ang polis ug gidala sa barangay hall diin didto na sila pusila sa makadaghan atubangan sa daghang mga mulopyo. Gitumbok sa kapolisan nga “masa” kun nagsimpatiya sa NPA ang sagad mga nanimuyo sa Barangay Mabato./AAJ