GARMA NGADTO SA PUBLIKO DILI SUGAL ANG LOTTO

Gitunol ni PCSO Gen. Mgr. Royina Garma ang tseke nga hinabang ngadto ni Kap. Marciano Ando alang sa mga biktima sa sunog sa Sitio Ponce 2, Carreta, Cebu City

CEBU CITY, PHILIPPINES- Dili sugal ang lotto ug uban pang number games sa Philippine Charity Sweeptakes Office (PCSO). Kini mao ang giluwatang pamahayag ni PCSO Gen. Manager Royina Garma, ang kanhing hepe sa Cebu City Police Office kinsa miasumir na sa iyang pwesto.

Si Garma mibutyag nga tungod niana iyang ilisan ang PCSO motto nga “Sa bawat taya para sa kawanggawa” ngadto na sa, “Bawat pisong tulong tungo sa pagsulong” tungod kay matud pa niya ang gipalit nga ticket sa lotto dili man sugal ang tuyo. Siya miingon nga ang panghuna-huna kun mindset sa mga tawo kinahanglan nga mausab kini nga ang gipalit nga lotto ticket donasyon alang ngadto sa nanginahanglan ug tabang ug dili usa ka matang sa sugal.

“Bawat pisong tulong, tungo sa pagsulong so its more positive so lets change the perception of people because we do not promote gambling trabaho yan ng Pagcor.Kami is to raise funds through our agents,” sumala pa ni Garma ngadto sa mga tigbalita.

Miabot kagahapon si Garma sa sugbu alang sa usa ka meeting sa iyang mga tawo sa kabisay-an ug ang paghatag niya ug tseke gikan sa PCSO ngadto sa mga nasunugan sa Barangay Carreta. Gipasabot ni Garma nga ang matag ticket sa gipalit nga lotto mao ang silbing resibo sa tabang nga gihatag sa nahingtundang tawo.

Kini samtang gibutyag usab ni Garma nga ang charity assistance nga ilang ihatag mahimo na nga 24/7 ug duna siyay mando nga kinahanglan nga dalion ra ang pag-atiman sa mudangup kanila. Ngadto sa mga naglinya gikan pa sa sayong takna sa kaadlawon, muhatag na usab ug “libreng lugaw” ang PCSO ngadto kanila.

“Yung aming account will be 24/7 available and then we will not let people wait. Fifteen minutes dapat tapos na ang transaksyon. Then we will find ways and means to provide kahit lugaw man lang sa umaga to provide to those clients na pumipila as early as 3 or 4am para maka avail sa assitance na ipinamimigay namin.”

Lakip sab sa gipatuman nga reporma ni Garma sa PCSO mao ang transparency diin ila nang ibutyag sa publiko pinaagi sa social media ang ilang mga gipanghatagan ug tabang. Tinguha niini matud pa niya arun mahibaw-an sa katawhan kun kinsa ang natabangan sa PCSO.

Gibutyag usab ni Garma nga duna siyay ilusad nga “Ipaalam kay GM” Facebook page arun nga makadawat sila ug feedback gikan sa publiko. Masaligon si Garma nga kining mao niya nga mga reporma muresulta sa pagsaka sa kita sa PCSO arun usab daghan ang pondo nga magamit nga ipanghatag ngadto sa mga nanginahanglang tawo./AAJ