SINAS SUPAK SA VIGILANTE

Share this on Social Media

CEBU CITY, PHILIPPINES- Supak ang kapolisan sa katukuran sa “vigilante.” Kini mao ang katin-awan nga giluwatan ni Police Regional Director Brigadier General Debold Sinas human mitumaw ang pagduda nga dunay “vigilante group” nga naglihok sa Dakbayan sa Talisay human lain na usab nga biktima ang gipatay nga gihigtan ug nakaangkon ug daghang samad pinusilan sa kalawasan.

“We do not encourage vigilante. Kung mag vigilante ka dakpon gihapon ka namo,” kusganong pamahayag ni Sinas ngadto sa mga tigbalita. Giluwatan ni Sinas ang maong pamahayag kagahapong adlawa, Huwebes, Hulyo 25, apan kaganihang kaadlawon lain na usab ang biktima ang hipalgan nga gigaid gihapon.

Ang biktima nailhan nga si Jerh Segue, 27, taga Barangay Lawaan 2 sa naasuyng syudad. Nakit-an si Segue nga gihigot sa poste sa Visayan Electric Company (VECO) didto sa Sitio Bogo, Barangay Camp 4 diin gikwintasan kini ug karton nga dunay sinuwat nga bahad nga “UNDANG NA LAGI MO UG DILI GANI KAMO NA ANG SUNOD TULISAN, DRUG PUSHER UG KILER/DRUG LORD.”

Unang gituhuang biktima sa vigilante si Renante Otero, 44, taga Brgy. San Isidro kinsa gibitay niadtong Hulyo 22 sa Taytayan sa maong barangay. Gibitay ug pisi si Otero ug gihigtan ang kamot sa iyang kaugalingong bakos diin gikwintasan gihapon ug karton nga dunay bahad nga nagkanayon, ” Ayaw ko ninyo sunda, tulisan ko.”

Niadtong Hulyo 25, gipusil sab sa makadaghan ug gihigtan ug liston sa iyang mga kamot si Jimbo Gadiano nga taga Barangay Lawaan 3 didto sa Barangay Lagtang. Hinoon sila ni Mayor Gerald Anthony Gullas ug Talisay City chief of police, Major Orlando Carag mipanghimakak nga dunay vigilante sa ilang dapit.

Segun sa kapolisan naghitak kaniadto ang shabu sa maong syudad ug sumala pa ni Gen. Sinas dili na sila gusto nga mahitabo pa kini. “Giampingan namo ang Talisay nga dili na gyud mamalik,” matud pa ni Sinas ngadto sa mga tigbalita. Notado sa kapolisan ang Barangay Tangke ug Tabunok diin matud pa dunay “shabu tiangge” kaniadto./AAJ

Leave a Reply

Your email address will not be published. Required fields are marked *