VINLUAN NANGUNAY SA PAGPANIRA SA MGA LOTTO OUTLET SA CEBU

CITY CEBU CITY, Philippines- Nangunay gyud mismo si Cebu City Police Office (CCPO) City Director Col. Gemma Cruz Vinluan sa pagpanira ug mga lotto outlets sa Dakbayan sa Sugbu.

Una niyang giadto pasado ala 1:00 karung hapon ang duha ka mga lotto outlets sa SM City Cebu ug gisunod dayon ang opisina sa Sinsilyo Small Town Lottery (STL) sa APM Centrale Mall.

“Papasara talaga lahat ito as per directive of President Duterte and RD Sinas,” matud pa ni Vinluan sa exclusive interview sa iNews.Ph kinsa miuban kaniya sa maong operation. Gisunod dayon ni Vinluan ang usa ka lotto outlet sa Barangay Carreta diin iyang gimanduan si Mabolo deputy police station chief Captain Miles Damoslog nga i-monitor ang tanang lotto outlets ubos sa ilang area of responsibility (AOR).

“I-monitor ninyo talaga baka mamya babalik na naman ng bukas,” matud pa ni Vinluan ngadto ni Damoslog. Si Vinluan mimando na sa tanang 11 ka CCPO police station chiefs nga higpit gyud nga ipatuman ang kamanduan ni Presidente Duterte nga pasiradhan ang tanang lotto outlets.

Si Police Regional Director Brig. Gen. Debold Sinas sa iyang bahin nagkanayon nga tanan gyud nga lotto outlets ang ipasira apil na ang dunay STL, Keno ug uban pa bisan pa ug dunay franchise sa LTO. Giklaro ni Sinas nga kamanduan sa Presidente nga isarado gyud tanan ug kun dunay musupak anaa na kini korte..

“That is the order of the President, di ba. It’s the President’s order so we have to follow it.They can question it in court but we will implement it as per directive of the President,” matud pa ni Sinas. Gimando ni Presidente Duterte niadtong byernes sa gabii nga pasiradhan ang tanang PCSO outlets tungod sa iyang pagbutyag nga dunay korapsyon nga nahitabo sa maong ahensya.

Iyang gimanduan si PNP Chief Oscar Albayalde ingon man si AFP Chief of Staff Benjamin Madrigal nga ipatuman ang iyang kamanduan sulod sa 24 oras. Segun sa report ni Sinas ngadto ni Albayalde kutob ganihang ala 1:00 sa hapon, nag-una ang Bohol Provincial Police Office sa labing daghan ug nasarado (196) , misunod ang Lapu-Lapu City Police Office (52) ug ang Mandaue City Police Office (44)./AAJ