PATAYNG LAWAS SA MGA NAMALAYE NGA NANGALUNOD SA ILOILO NAHIBALIK NA SA SUGBU

Ang mga biktima sa lunod sa Ilo-ilo City (mga hulagway gikan sa OPAV pinaagi ni HT Lenis)

Share this on Social Media

ERMITA, CEBU CITY- Niabot na dinhi sa Sugbu kagahapon ang patayng lawas niadtong siyam ka mga mulopyo dinhi niining maong barangay nga nangalumos didto sa kadagatan sa Iloilo human malunod ang lantsa nga ilang gisakyan niadtong Sabado, Agosto 3, 2019.

Pauli na unta sila Sugbu human sila “namalaye” didto sa Guimaras apan madisgrasya na hinoon mugna sa kalit nga “subasko (unos)” nga maoy hinungdan nga nalunod ang bangka nga ilang gisakyan. Sa maong trahedya, lakip ang ilang gisakyan sa tulo ka lantsang nalunod didto sa Iloilo Strait nga misangpot sa kamatayon sa 31 ka mga tawo.

Apil sa mga nakalas ang pipila ka magtutudlo sa Lambunao National High School sa Iloilo ingon man mga Overseas Foreign Workers (OFW’s) nga luwan sab sa maong mga bangka. Ang patayng lawas sa mga biktima nga taga Sugbu gikarga sa C-130 plane nga mitugpa sa Mactan Benito Ebuen Airbase pasado alas 4:00 ang takna sa hapon ug gisugat mismo ni Mayor Edgardo Labella ingon man sa mga tinugyanan sa Office of the Presidentjal Assistant for the Visayas (OPAV) ni Sec. Michael Dino nga sa sayo pa maoy mipahigayun nga magamit ang maong eroplano sa gobyerno.

Gilahos dayon sa barangay gym dinhi ang mga lungon nga gisudlan sa mga biktima diin diri na usab mismo sila hayaon. Ang mga nakalas mao sila si Romeo Baguio, Sr, 56, iyang asawa nga si Angelina,54, ilang anak nga si Romnel, 31, asawa niini nga si Danilyn, 27, ug anak nga si Dannelle, 3, ug ilang mga paryente nga sila si Bernardo Janson, 56 ug Jared Janson, 4.

Ang anak ni Romeo nga si Romeo Jr, 29, nga nagtrabaho sa Mitsumi sa Dakbayan sa Danao nga maoy namalaye ug ang anak sab niini nga si Jay Arvien, 3, wala na mahikuyog tungod kay ang iyang pakaslan unta nga si Maria Nieves Grandeza nga naluwas sa maong pagkalunod nidesisyon nga adto na sila ilubong sa Guimaras.

Si Romhel Baguio, 33, maguwang ni Romeo Jr. ug Romnel miingon nga kuyog usab unta siya sa maong pamalaye apan wala mudayon. Matud pa niya nga libre unta siya sa pletehan ug uban pang gastohan apan mibalibad siya sa dihang mularga na gumikan kay duna siyay adlaw-adlaw nga bayranan sa iyang gihuwaman ug kwarta wala pay labot sa iyang obligasyon sa iyang kaugalingong pamilya. “Ako silang gibalibaran kay naa pud koy datahan kada adlaw diri.

Unya kinahanglan sab nga dunay kunsumo akong pamilya,” sugilon pa niya sa Inews.Ph nga hapit nang mutulo ang luha. “Ug nikuyog pa ko, lagmit lungon na pud ko karun,” dugang pa ni Romhel kansang panginabuhian trisikad driver sa ilang dapit.

Matud pa niya ang iyang manghod nga si Romeo Jr. alias Jay-Ar mupakasal na unta sa sunod tuig ngadto ni Maria Nieves sanglit nakatigom na ang duruha nga taud-taud nang nagkapuyo. Tungod kay mupakasal na unta mao tung nigikan sila niadtong Agosto 1, Huwebes ug padulong na unta mamauli sa Sugbu dihang nahitabo ang pagkalunod sa ilang lantsang gisakyan nga mitabok paingon sa Iloilo gikan sa Guimaras.

Gawas ni Romhel kinsa dunay usa pud ka anak uban sa iyang asawa, duna pa siyay manghod nga babaye nga nakuyapan sa iyang paghinilak sa pag-abot sa patayng lawas sa ilang mga ginikanan ug sa ilang igsoong si Romnel kansang asawa ug anak pulos sab nakalas sa trahedya.

Nagtrabaho si Romnel isip mekaniko sa usa ka inilang car manufacturing company sa sales ug servicing office niini sa Dakbayan sa Talisay. Si Razel Cuizon, ang public information officer (PIO) sa Dakbayan sa Sugbu miingon nga gawas sa pag-abaga sa burial expenses, muhatag sab ug hinabang nga pinansyal si Mayor Labella.

Si Sec. Dino muhatag usab, samtang ang OPAV maoy mangunay nga mahikay gilayon sa Department of Foreign Affairs (DFA) ang passport nga nangahanaw sa mga naluwas nga OFW sa maong trahedya sa kadagatan./AAJ

 

Si Romeo Baguio, Jr. (wala) tupad sa iyang gipamalay-an nga si Maria Nieves. Lain nga gilinginan mao ang iyang inahan nga si Angelina ug mga apo niini nga si Jay Arvien ug Dannele. Si Romeo Sr. mao ang naglingkod sa tunga sa lamesa. (tampo nga hulagway gikan sa pamilyang Baguio)

 

 

 

Mayor Labella misugat sa pag-abot sa mga patayng lawas sa mga biktima sa trahedya sa Ilo-ilo

 

Si Romnel Baguio ug iyang asawa nga si Danilyn ug anak nga si Danelle kinsa pulos gyud nangakalas sa trahedya sa Iloilo (tampo nga hulagway)

 

Leave a Reply

Your email address will not be published. Required fields are marked *