NOTADONG PINIRESO SA BOHOL NAKUHAAN UG SHABU SULOD SA PRESUHAN

ang mga pinireso sa Bohol District Jail atul sa Greyhound Operation (PRO7 photos)

Share this on Social Media

Nakuhaan ug shabu sulod sa iyang selda ang usa ka notadong pinireso sa Bohol District Jail nga nahimutang sa Barangay Cabawan sa Syudad sa Tagbilaran.

Giila ang suspetsado nga si Oliver Manubag kinsa nag-atubang usab ug kasong illegal possession of drugs human siya masikop niadtong Hunyo 2015 sa Panglao, Bohol.

Nahitabo ang pagkasakmit sa shabu gikan ni Manubag dihang gipahigayun kaganihang sayo sa buntag, alas 5:00 ang takna, Agosto 18, 2019, ang OPERATION GREYHOUND nga gipangulohan mismo ni Bohol Provincial Police Director Colonel Jonathan Cabal.

Didto sa sulod sa iyang selda, Cell Number 20 ang suspetsado dihang nakuha ang mga ebedensya batok kaniya nga gilangkuban ug 28 ka pakete sa shabu nga giputos ug cellophane.

Si Manubag ug lain pang duha kinsa gikatahu nga mga taga Dakbayan sa Sugbu apan nanglangyaw sa Bohol nadakpan na kaniadto sa mga sakop ni Major Joemar Pomarejos sa Panglao sa usa ka buy bust operation.

Samtang segun pa sa Phil. Drug Enforcement Agency (PDEA7) nga kuyog sab sa operasyon nakuha mismo ang mga shabu diha sa short-pants ni Mabubag.

Ang PDEA 7 maoy unang mitahu sa operasyon diha sa Facebook page niini samtang ang buhatan ni Colonel Cabal mitahu usab sa Police Regional Office (PRO7) headquarters.

Atul sab sa maong operasyon nakuha usab ang mga nagkadaiyang cellphone ug sim cards gikan sa ubang selda ingon mga improvised pointed weapons, kwarta ug mga nagkadaiyang record books nga dunay pangalan ug numero sa mga tawo.

Misalmot sab sa maong operasyon kaganiha ang mga sakop sa National Bureau of Investigation (NBI)./AAJ

 

Leave a Reply

Your email address will not be published. Required fields are marked *