CREW SA BARKO GIDAKOP MISMO SA BARKO NGA IYANG GISAKYAN KAY NAMALIGYA UG SHABU

Ang dinakpan nga si Reuben Tabotabo (photo courtesy of Cebu Coastguard)

CEBU CITY, Philippines- Nasikop kagabii ang usa ka crew sa barko human kini namaligya ug shabu mismo sa barko nga iyang gisakyan. Giila ang suspetsado nga si Reuben Tabotabo, 43, lumad nga taga Maasin, Southern Leyte apan nagsakay sa barko nga MV Filipinas-Cagayan de Oro nga gipanag-iya sa Cokaliong Shipping Lines.

Sumala pa ni Lt. Junior Grade Michael John Encina, ang tigpamaba sa Coast Guard Central Visayas nga nadakpan si Tabotabo sa dihang gipahigayun ang usa ka buy-bust operation ngadto sa suspetsado samtang nagdunggo ang iyang barkong gisakyan mga alas 8:00 ang takna kagabii, Dominggo, Agosto 18, 2019. Mga sakop sa kapolisan sa Jagna ang mipahigayun sa buy-bust operation, Provincial Intelligence Branch (PIB) ug coast guard Jagna matud ni Encina.

Nibaligya ang suspetsado ug duha ka paketeng shabu ngadto sa usa ka poseur buyer diin nasundan pa gyud kini ug pagkasakmit ug dugang pang shabu sa dihang gihiling ang iyang kamarote sa mga operatiba diin saksi mismo ang kapitan sa barko. Subay niini gipasalamatan ni Encina ang kooperasyon sa Kapitan sa barko ingon man sa uban pang mga crew niini ug siya miawhag sa mga nanag-iya ug barko ng mupahigayun ug random drug test sa ilang mga tripulante.

“We thank them for their cooperation sir and will advice them, and all other shipping stakeholders, to conduct random drug inspections to their crew as well,” matud pa ni Encina. Ang Coast Guard Jagna miluwat ug Certificate of Orderly Inspection (COI) sa maong barko nga gipirmahan sab sa nahingtungdang kapitan. Bukas ang Inews.Ph sa reaksyon sa management sa Cokaliong Shipping Lines kalabot ning maong hitabo./AAJ