Salvage victim sa Balamban, Wanted?

Patay nga lawas gi-alarma sa Sitio Buli, Barangay Cansomoroy, Balamban pasado alas noybe sa gabii (Agosto 20, 2019). Nailhan ang biktima nga usa ka Armando Bernaldez Oppus, 34 anyos, ulitawo, residente sa Lunar St., Doña Vicenta, Davao City.

Mga alas 9:40 sa kagabhion nadawat sa kapolisan sa lungsod sa Balamban ang alarma sa gikatahong patay nga lawas sa usa ka tawo sa nahisgutang lugar.

Sa pagpangulo ni Police Major Christian B. Torres nakompirmar nila ang patay’ng lawas nga nagbay-ad daplin sa karsada, gigapos ang mga kamot ug giputos ang nawong niini sa usa ka boxer short.

Sa gihimong pagproseso sa SOCO Team sa crime scene napalgan nila ang upat ka bala sa .45 caliber pistol sa lugar. Apan paglabay sa pipila ka minuto laing alarma sa kapolisan gikan kang Barangay Kapitan Jose Bebelonio Pepito sa Barangay Sunog, Balamban kalabut sa usa ka MUX IZUSU SUV nga adunay plaka AEB 4462 ang gisunog ug gihagbong sa pangpang sa Sitio Cambagocboc sa nahisgutang barangay.

Narekober ang driver’s license ug passport sa biktima, mga resibo, naguba nga cellular phone ug 47 ka piraso sa sunog nga tag usa ka gatos ka pesos. Apan sa Facebook page sa Balamban Police Station adunay nagpost nga wanted sa kasong large scale estafa ang biktima.

Kapolisan padayon pa sa ilang imbistigasyon sa kaso./RP