DUHA KA BIG TIME SHABU PUSHER SA BOHOL PATAY SA BUY-BUST, P6.8 NGA SHABU NASAKMIT

Share this on Social Media

Clarin, Bohol – Patay sa usa ka buy-bust operation ang duha ka mga tawo kinsa gitumbok nga big-time shabu pushers.

Segun sa report nga nahidangat sa Police Regional Office (PRO7) ang nangamatay mao ang manag-agaw nga sila si Esterio Quino ug Isagani Canete, pulos hingkod, didto sila mapatay sa Barangay Bacani, Clarin human nga nisukol sa mga operatiba.

Mga tinugyanan sa Regional Special Action Group (RSOG) ug sa Provincial Intelligence Group (PIB-Bohol) ug Clarin police station ang mipahigayun sa maong operasyon pasado alas 11:00 ang takna kagahapon sa buntag.

Gawas sa pagkapatay sa duha, nasikop usab ang unom pa ka mga laing suspetsado lakip na ang duha ka menor de edad nga giingong sakop usab sa maong grupo.Gawas sa mga menor de edad, ang mga nadakpan giila nga sila Ericson Redulla, 28; Victor Quiño, 58; Joseph Cañete, 33; ug Arnel Cañete, 20; pulos mga mulopyo sa maong dapit.

Segun sa mga otoridad nga naglakip sa mga tinugyanan sa Phil. Drug Enforcement Agency (PDEA7) nakuha gikan sa grupo ang dili momenos sa usa ka kilo nga shabu nga mukabat ug P6.8 milyones pesos.

Nakuha usab ang armas nga gigamit sa mga napatay, usa .45 caliber pistol ug KG-9 submachine gun.

Segun sa report, sakop sa big time drug group ang mga nahilambigit kinsa maka supply ug sobra sa katunga sa shabu nga gipakatap sa Bohol.

Nahibaw-an sa intel nga gikan sa Sugbu ang tinubdan sa shabu sa maong grupo nga ikarga ug pumpboat paingon sa Clarin.

Gumikan sa dakong kalampusan sa operasyon personal nga misusi sa dapit sa nahitabuan sila si Gov. Arthur Yap ug Bohol Provincial Police Director Col. Jonathan Cabal.

Sa sayo pa si Cabal kinsa nahimo usab nga hepe sa Regional Intelligence Division (R2) kaniadto misugilon sa Inews.Ph nga ang subsob nga kampanya batok sa illegal nga drugas ang usa sa iyang ipatuman didto sa iyang area of responsibility (AOR). /AAJ

 

Leave a Reply

Your email address will not be published. Required fields are marked *