P6.8 MILYONES NGA SHABU NASAKMIT GIKAN SA MANAGKAPUYO

Share this on Social Media

Mukabat sa P6.8 milyones nga shabu ang nasakmit kagabii sa managkapuyo didto sa Dakbayan sa Lapu-Lapu.

Sa report nga nahidangat sa Police Regional Office (PRO7) giila ang mga dinakpan nga sila si Arcelia Tamaron, 35, ug Stanley Urdaneta, 37, kinsa nasikop sa mga sakop sa City Intelligence Branch (CIB), Drug Enforcement Unit (DEU) sa Lapu-Lapu City Police Office ingon man sa Phil. Drug Enforcement Agency (PDEA7).

Nangulo sa operasyon si Lt. Col. Mark Gifter Sucalit, hepe sa CIB kinsa mipahigayun ug buy-bust operation ngadto sa duha pasado alas 11:00 ang takna sa Sitio Mustang, Barangay Pusok sa nahisgutang Dakbayan.

Lakip sa nakuha nga ebedensya batok sa duha nga giingong mga high-value targets (HVT’s) ang usa ka awto ingon man .45 kalibreng pistola nga walay lisenya.

Nasuta sa inbestigasyon nga ang duha kasamtangan nga nanimuyo sa Wellos Homes Subdivision sa Estaca, Compostela apan pulos sila mga lumad sa Dakbayan sa Sugbu.

Gikatakda na ang pagpasaka ug tukmang sumbong batok kanila karung adlawa sa piskaliya./AAJ

 

Leave a Reply

Your email address will not be published. Required fields are marked *