MGA CHINESE NGA GIDAKOP SA POGO SA MACTAN KARUN PA MABUHIAN

Ang mga Chinese nationals gawas sa CIDG7 headquarters

Share this on Social Media

Posibleng karung adlawa pa mabuhian kadtong mga Chinese nationals nga gitumbok nga nga nagtrabaho sa usa ka Philippine Offshore Gaming Operator (POGO) sa Mactan, Lapu-Lapu City.

Kana kun makapyansa ang maong dul-an sa 200 ka mga Intsik nga nagtrabaho sa Xin Huang Jin Cheng Co. Ltd. kinsa gitumbok nga nahilambigit sa online gambling.

Si Major Nino Lope Briones, ang hepe sa Criminal Investigation and Detection Group (CIDG) Metro Cebu Field Unit miingon nga ilang ipasaka karung adlawa ang kasong kriminal sa mga dinakpan.

Ang kaso mao ang kalapasan sa Presidential Decree 1602 (illegal gambling) ug ang kalambigitan niini sa RA 10175 (cybercrime law).

Human sa pagpasaka sa kaso makapyansa na ug makagawas gikan sa compound sa Camp Sotero Cabahug ang maong mga langyaw diin didto sila gibutang human sa pagsikop kanila niadtong Sabado sa kaadlawon.

Giklaro ni Briones nga walay napakita nga papeles ang mga kadagkuan sa maong establismiento nga nahimutang sa Mactan Newtown nga nagtugot kanila nga mahimo silang POGO ubos sa pagtugot sa PAGCOR.

Hinoon nangatarungan kini nga usa ka call center o Business Profit Outsourcing (BPO) apan dili kini mao ang ilang gihimo.

“Wala pa, wala pang ano.We been waiting for that, wala silang mapakita sa atin. Iba-iba ang ipinapakita nilang papel but with regard to Pogo license wala sila,” mitug-an si Briones sa mga tigbalita.

 

Major Nino Lope Briones, hepe sa CIDG7 Metro Cebu Field Unit

Gisubli ni Briones nga usa sa ilang lig-ong ebedensya nga nahilambigit ang maong establismiento sa online gambling mao nga nakahimo gyud sila sa pagpusta sa online website nga maoy gigamit sa maong mga Chinese.

“Natayaan nga natin yan through online and yung online website na natayaaan natin is the same website na nakita natin doon sa place when we implemented the search warrant,” dugang nga pagsugilon ni Amancia.

Ang operasyon sa CIDG gipasikad sa search warrant nga giisyu ni Judge Soliver Peras sa Regional Trial Court (RTC) branch 10.

Segun sa ihap, ang mga dinakpan nga sagad mga lalaki maglakip sa 43 ka mga babaye.

 

Susihon usab sa CIDG kun ugaling duna bay working permit gikan sa Bureau of Immigration ingon man sa Dept. of Labor and Employment (DOLE) ang maong mga Chinese nationals./AAJ

 

Leave a Reply

Your email address will not be published. Required fields are marked *