SUPPLY SA KARNENG BABOY SA SUGBU DI RA MAGKUWANG KUN I-BAN ANG GIKAN SA LUZON

Si PB member Ma. Victoria Corominas-Toribio (nagunit sa microphone) kinsa mibutyag nga walay paghiling sa mga bagahe sa mga domestic passengers sa Mactan airport.

Share this on Social Media

CEBU CITY, Philippines- Dili ra magkuwang ang supply sa karneng baboy sa Sugbu kun ugaling ipatuman ang total ban sa mga karne nga gikan sa Luzon.

Kini maoy giluwatan nga pamahayag ni Roland Tambago, ang presidente sa Central Visayas Pork Producers Cooperative (CeVIPPCo) agi ug reaksyon sa gilaraw ni Gobernador Gwen Garcia nga ipatuman ang “total ban” sa mga pork ug pork related products gikan sa Luzon human nga gikumpirmar mismo ni Agriculture Secretary William Dar nga miigo na ang African Swine Fever (ASF) didtong dapita.

Gibutyag ni Dar niadtong lunes nga positibo sa ASF ang mga blood samples sa mga baboy gikan sa Rizal ug Bulacan nga sa sayo pa gipaubos sa “kal (cull)” human nga nangamatay ang daghan niini.

Pagsuta sa laboratoryo sa UK nakumpirmar gyud nga ASF ang miigo sa maong mga baboy nga namatay.

Giklaro ni Tambago nga 85 porsyento sa pork demand sa Sugbu lokal ra ang tinubdan niini ug ang nahabilin nga 15 porsyento mao na ang gikan sa gawas.

“Normally dili gyud siya ma-affected because Cebu is supplying 85 percent of our consumption and we are getting our other supply from Mindanao. We are not getting our supply from Luzon for pork,” pamahayag ni Tambago ngadto sa mga tigbalita kagabii human sa meeting sa ASF Cebu Task Force nga gipatawag ni Gob. Garcia sa kapitolyo.

Nabalaka si Garcia sa mahimong sangputanan sa pagkakumpirmar sa ASF sa Rizal ug Bulacan diin matud pa niya nga gikan sa
nagtupad ra nga rehiyon didto, Region 4A ug Region 3.

Ang usa sa gikabalak-an sa Gobernador ang mga processed pork products (ang brand gipug-an sa Inews.Ph) diin matud pa niya malagmit nga ang gigamit nga karne sa Luzon ra usab.

Si Gobernador Garcia mibutyag nga muhimo siya ug desisyon human sab sa iyang kunsultasyon ngadto ni Bohol Governor Arthur Yap diin mipatuman sab sa gitawag ug ‘regulatory ban” sa mga baboy, mga karne niini ug mga pork related products.

Sa kasamtangan giawhag ni Garcia ang mga sakop sa ASF Task Force nga dugangan pa ang ilang pagmatngon nga dili makasulod ang ASF sa probinsya.

Usa sa gituki mao ang pag-gamit sa mga gitawag ug “pork sniffing dogs” nga ipakatap sa airport ug seaports apan segun ni DA Regional Director Salva Diputado lisud pangitaon ang susama ug abilidad nga iro.

Nasuta usab ang mga kakuwangan ilabi na sa Mactan Cebu International Airport diin gikabutyag ni Provincial Board (PB) member Ma. Victoria Corominas-Toribio walay pagsusi sa mga bagahe sa mga domestic passengers bisan pa sa gipatuman nga 100 days “regulatory” pork ban.

Ang mga tigdumala sa airport miangkon nga walay x-ray sa mga bagahe ang domestic airport (Terminal 1) hinungdan nga dili matagsa-tagsa ang paghiling sa mga bagahe.

Namatikdan usab ang pagsaka sa presyo sa karneng baboy sa Carbon market ug tungod niini muhimo ug pagpatawag sa mga sakop sa price monitoring council si Gobernador Garcia kun gikihinanglan.

Ang ASF makamatay sulod sa duha ka adlaw sa mga baboy nga matakbuyan niini hinoon dili ra makaapekto sa tawo nga makakaon sa karne./AAJ

Leave a Reply

Your email address will not be published. Required fields are marked *