MGA KAPITAN SA LAPULAPU MIKIHA NI MAYOR CHAN

Share this on Social Media

LAPU-LAPU CITY, Philippines – Nag-atubang karun ug daghang kiha si Lapulapu City Mayor Junard “Ahong” Chan sa buhatan sa Ombudsman human nga mikiha kaniya ang mayoriya sa mga Kapitan sa maong syudad. Gipangulohan ni Konsehal Eduardo Cuizon ang presidente sa Association of Barangay Councils (ABC) may kalabutan ang maong mga kiha sa pagpasira ni Chan sa opisina ni Lapu-Lapu City Congresswoman Paz Radaza.

Inabagan ni Atty. Richard Bauzon, 25 sa 30 ka mga Kapitan sa syudad ang mikiha ni Chan sa mga kasong grave coercion, grave misconduct, conduct unbecoming of a public officer, grave abuse of authority, oppression, ug violation of section 3(e) of RA 3019 (corrupt practices of public officers-causing any undue injury to any party including the government). Gipangayo sa mga kapitan ngadto sa Ombudsman for the Visayas nga ipaubos sa “preventive suspension” si Mayor Chan.

“We are also requesting the office of the Ombudsman to place City Mayor JUNARD “AHONG” CHAN (emphasis supplied) under preventive suspension for six (6) months in order to prevent him from using his office from harassing and influencing possible witnesses of the incident.”

Si Chan gipangayuan sa iyang reaksyon sa Inews.Ph sa telepono apan wala kini mutubag sa text message. Gisaysay sa mga Kapitan nga dili makasira si Mayor Chan sa congressional office ni Cong. Radaza sanglit duna pay pending nga kaso kalabot niini sa hukmanan. Gihimong basehanan ni Mayor Chan sa iyang notice to vacate kaniadto ang legal opinion sa Department of Interior and Local Government (DILG) apan matud pa sa mga Kapitan nga opinyon lamang kini ug wala sab kini muingon nga mupahawa na si Congresswoman Radaza sa opisina.

Misugilon ang mga Kapitan nga “daw illegal (appears to be an illegal order)” ang pagpasira sa maong congressional office nga nahimutang sa city hall ug tungod niini naapektahan sila sa ilang pagpangayo ug “assistance” sa maong opisina lakip na usab ang ilang mga katagi barangay nga dunay mga tuyo ngadto sa maong opisina. Dunay mikiha ni Cong. Radaza sa korte labot sa pag-gamit sa maong opisina nga gipasubay sa usa ka city ordinance (City Ord. No. 14-200-2019) ug sumala pa sa mga abugado ni Radaza nga huwaton nila ang desisyon sa korte kalabot niini.

Ilang gihuwat kun i-anular ba o ipatigbabaw sa korte ang maong ordinansa. Gawas ni Cuizon ang mga miipirma sa kiha batok ni Mayor Chan mao sila si Kapitan (Kap) Jimboy Ygot (Agus), Kap Arsenio Berdin (Babag), Kap Isabelo Darnayla (Basak), Kap Lorna Soriano (Buaya), Kap Reynaldo Tampus (Canjulao), Kap Arselito Pejo (Calawisan), Kap Ranilo Abayan (Caohagan), Kap Jackson Matbagon (Caubian), Kap Eleonor Fontanoza (Gun-ob), Kap Mary Jane Cahilog (Ibo), Kap Regina Ybanez (Looc), Kap Evaristo Dihayco, Jr. (Mactan), Kap Rosalindo Abing (Maribago), Kap Johanna Capangpangan (Pajac), Kap Virgilio Casio (Pangan-an), Kap Tirso Tumulak (Poblacion), Kap Crisanto Estardo (Punta Engano), Kap Justino Booc, Jr. (Pusok), Kap Nelson Melancolico (Sabang), Kap Cyrus Eyas (San Vicente), Kap Joselito Tibon (Suba Basbas), Kap Virgilio Dano (Talima), Kap Audie Flores (Tingo) ug Kap Triponia Abayan (Tungasan).

Sa miaging eleksyon sa Mayo, gawas ni Chan nga kanhi Barangay Kapitan sa Pajo, bugtong si Kapitan Francisco Gelig sa Santa Rosa ang midapig ni Chan gani milansar si Gelig pagka konsehal sa syudad apan napildi. Gawas ni Gelig ug sa mihulip nga Barangay Kapitan sa Pajo, wala sab mupirma sa kiha (subay sa kopya nga nakuha sa Inews.Ph) sila si Kap Romulo Wagwag sa Baring, Kap Efren Apa sa Caw-oy ug Kap Lucrecia Amores sa Marigondon./AAJ

 

Leave a Reply

Your email address will not be published. Required fields are marked *