PASAHERO SA ANGKAS INSURED UG 450K

Si Angkas founder/CEO Angeline Tham (naay mikropono), uban ni Angkas assistant manager for operations Lachme Reboton (wala), chief transport advocate Gilbert Olana, ug Jobert Bolanos, chairman sa Riders of the Philippines (ROTP)

Share this on Social Media

CEBU CITY, Philippines- Kung sa habal-habal tabla ang usa ka pasahero kun simbako madisgrasya sa Angkas insured kini.

Kini maoy subling gipahibawo sa Angkas founder nga si Angeline Tham kinsa miabot sa Sugbu kagahapon sa pagpangulo sa Angkas Safety Fiesta nga gipahigayun sa Plaza Independecia.

“Sukad pa sa sinugdanan,ang insurance coverage mukabat ug four hundred fifty thousand pesos (P450, 000),” sumala pa ni Tham sa English atul sa ilang press conference sa makasaysayanon nga Fort San Pedro.

Dili hinoon kini ang kinatibuk-ang kantidad sa insurance sanglit agad kini sa kadaot sa pasahero ingon man ngadto sa Angkas driver nga mahitungdan.

Dunay P100,000 nga kantidad alang sa medical reimbursement dugang pagpasabot ni Tham kinsa mao usab ang Angkas Chief Executive Officer (CEO).

Ang kalihukan kagahapon maoy tipik sa panawagan sa Angkas nga mahingpit na ang legalization sa maong motorcycle app riding sharing company nga gisugdan ni Tham niadtong 2016.

Ubos pa sa “6 months pilot run” ang Angkas human nga miuyon niini ang gobyerno pinaagi sa giumol nga Techical Working Group (TWG) sa Department of Transportation (DOTr).

Dunay nag-ung-ong nga balaudnon sa kongreso nga himuon nang legal ang mga “motorcycle taxis” sa nasud gumikan usab sa obserbasyon nga dako kini ug matabang ngadto sa riding public ilabi na sa panahon sa traffic ug nagdali ang sumasakay.

Samtang gipaniguro ni Tham nga gibansay ug maayo ang tanan nilang accredited drivers gani dili tanan nga gipaubos sa ilang “free training” ang mahatagan sa maong accreditation.

Iyang gibutyag nga dul-an ra sa trienta porsyento ang makapasar apan iyang gidasig ang kadtong nakapahigayun na sa training nga musubli sa tinguha nga mahimong hingpit nga Angkas driver.

Gibutyag ni Lachme Reboton, Angkas assistant manager for operations nga ang ilang mga full time drivers maka-income ug labing menos dos mil pesos matag adlaw depende sa kakugi sa maong driver.

Naa ra gyud sa driver mismo sanglit wala man kiniy agawon ug depende ra usab sa dawaton niini nga pasahero pinaagi diha sa iyang cellphone app.

“The average income depende if part time or full time, but you know what na suprise ko, those who are full timers, its more than two thousand pesos,” matud pa ni Reboton.

Kuyog usab sa maong presscon ang transport advocate nga si Gilbert Olana ug si Jobert Bolanos, chairman sa motorcycle rights oganization nga Riders of the Philippines (ROTP).

Ang Angkas mipahibawo usab nga dunay 24/7 nga emergency team ang ilang kumpaniya nga mutubag sa mga panghitabo apan matud pa nila nga tungod sa ilang higpit nga training ngadto sa mga accredited drivers ilabi na sa riding safety, 99% nga luwas ang ilang mga pasahero.

Ang matag aplikante ipaubos sa written exam human nga masumitir na ang tanang requirements sa dili pa ipaubos sa training nga libre.

Mukabat sa 7,000 ang Angkas accredited drivers sa Sugbu apan 5, 000 ra ang full time niini.

Gipahibawo sa Angkas nga ila pang dugangan ang maong mga accredited drivers sa Metro Cebu. /AAJ

 

ang ANGKAS Safety Fiesta sa Plaza Independencia

Leave a Reply

Your email address will not be published. Required fields are marked *