7 KA TRAFFIC ENFORCERS SA OPON LAKIP NA ANG USA KA BABAYE POSITIBO SA SHABU

Share this on Social Media

LAPU-LAPU CITY, Philippines- Pito ka mga traffic enforcers dinhi ning maong syudad ang nag positibo sa ginadiling drugas sa gipahigayun nga “surprise drug test” ngadto kanila. Si Mayor Junard “Ahong” Chan mibutyag nga usa sa pito ang babaye diin sumala pa niya “automatic” kini nga mataktak sa trabaho.

Matud pa sa Mayor nga makonsiderar gani nga walo gyud tanan ang positibo sanglit ang usa wala na mubalik pa human nga mipauli kini ug giingnan ang usa ka tinugyanan sa City of Lapulapu Office of Substance Abuse Prevention (CLOSAP) nga maoy mangihi alang sa iyang “urine specimen” sa maong drug test. “Dunay pito ka buok nga nag positibo sa ginadiling drugas nag gamitan ug shabu.

Dunay usa ani niya nga ma-considered nato nga ikawalo gumikan kay ang iyang pag-ihi iyang giingnan ang myembro sa CLOSAP nato nga maoy paihion sa iyang ihi unya gitagaan nato siya ug higayun nga mu-under go gyud apan wala na magpakita so kadto siya considered nga positive,” sumala pa ni Mayor Chan ngadto sa mga tigbalita.

Si CLOSAP chief Gary Lao mipasabot nga gihuwat gyud nila ang maong enforcer nga mubalik apan hangtud nga natapos na sila niadtong adlawng Lunes wala na gyud kini mubalik pa sa Hoopsdome sa Barangay Gun-ob diin didto ang maong drug test gipahigayun.

Mingon si Lao nga dunay tulo sa 242 ka mga sakop sa City Traffic Management System (CTMS) ang wala makatunga tungod kay “sick leave” ug ila sab gyud kini nga ipaubos sa drug test. Lakip na kadtong babaye nga enforcer, mahimong ipaubos pa sila sa “confirmatory test” kun ilang i-contest ang resulta apan sagad sa ilang eksperyensya ang mga positibo dili na niini ilabi pa kun nag gamit gyud kini sa ginadili nga drugas.

Gipasabot ni Mayor Chan nga giuna nila sa drug test ang mga enforcers sanglit anaa kini sa kadalanan ug gusto niya nga walay bisan usa ka traffic enforcer ang mugamit sa illegal drugs. “Sila atung gi-prioritize kay sila tanan naa sa field dili ta ganahan nga duna tay traffic enforcer nga mag-gamitan kay kun mag gamitan gud dili sakto ang panghuna-huna anha musud ang pagpa-ngotong kun ikaw mag gamitan mangita ka ug kwarta so mauna mangita ka ug paagi” mipasabot ang Mayor.

“Gisiguro gyud nato nga ang atuang trabahante sa CTMS wala mahilambigit sa ginadiling drugas,” dugang pang pamahayag ni Mayor Chan./AAJ

Leave a Reply

Your email address will not be published. Required fields are marked *