HEPE SA HOMECARE CHILDREN SA LAPULAPU NANGHIMAKAK NGA GIMALTRATO NILA ANG MGA BATA

Share this on Social Media

LAPULAPU CITY, Philippines- Gipanghimakak sa hepe sa Homecare Center for Children (HCC) dinhi ning maong syudad nga gimaltrato nila ang mga babayeng menor de edad sa maong sentro.

Si Leticia Patalinghug miingon nga siya mismo ang nangulo sa HCC sukad sa pagbukas niini napulo na ka tuig ang milabay ug karun pa nahitabo nga dunay mireklamo kanila.

Si Patalinghug nga usa ka licensed social worker miingon nga nagtinarung gyud sila sa ilang trabaho kauban ang iyang assistant nga si Virginia Dihayco kinsa gitaktak na uban kaniya human sa protesta sa maong mga mga menor de edad.

Si Patalinghug miingon nga isip usa ka social worker nahibawo siya sa ilang code of ethics. “Sa amoang side kami nga staff nagtarong tawn mi sa among trabaho Sir oi wala tawn mi anang pamolitika. Nga kanang kay dili ang among administrasyon mao na among gibuhat dili man Sir. Kay as social worker, is a noble profession.

Wala man mi ana, sa among code of ethics nga mag-ingon ana mi,” matud pa ni Patalinghug sa dihang nahinabi sa Inews.Ph. Wala na muhatag sa iyang reaksyon si Dihayco apan si Patalinghug mitagsa-tagsa sa pagtubag sa mga pasangil sa mga bata kinsa mihulga nga maglaslas sa ilang mga pulso kun ugaling dili taktakon ang naasuyng duha ka mga kanhi HCC social workers.

Gipanghimakak ni Patalinghug nga mirasyon sila ug dyutay nga sabon pangkaligo (bath soap) sa mga bata. Iyang giangkon hinoon nga ang gamay nga sabon gipatunga nila sa duha ka mga bata apan dili tinuod nga alang ra kini sa usa ka buwan nga kunsumo lakip na niini ang tagurha ka sachets sa shampoo.

“Kanang allegation sa mga bata part gyud na sa discipline namo kanang pag thriftiness kamao gyud sila magdaginot mao nang sabon kuanon gyud namo. Nasuwayan na man namo ihatag tanan, ilang usik-usikan ra man.

One week na siya dili one month bisan pa ug pangutan-on nimo ang mga bata,” matud pa ni Patalinghug sa maong pakighinabi. Kabahin sa pasud-anon ug sardinas nga sagunson tagpila ka adlaw, gipanghimakak sab kini niya sanglit matud pa niya ang pagsud-an ug sardinas mahitabo lang kung hapit na mahurot ang ilang stocks.

Ang pagpasud-an ug sardinas inig pamahaw ra usab ug lahi na ang sud-an inig paniudto ug panihapon. “Kanang back up ra gyud na namo sardines kay mangayo pa man mi so mahurot na gani ang among budget mao nang sa buntag magkuan mi magdaginot inig udto ug panihapon mao nay gikan gud sa eskwelahan ang mga bata so mao nay mas maayo ang pagkaon nila sa udto ug panihapon kanang heavy.

Sa buntag among i-back up kadtong sardines pero dili ingon nga kada adlaw, naa gyud na siyay variation.” Kabahin sa pasangil nga dili nila paduwaon ang mga bata, gipanghimakak sab kini ni Patalinghug sanglit makaduwa gihapon ang mga bata apan ila lang kining gibuwag ngadto sa mga lalaki.

Ang pinakabug-at nga rason ngano nga buwagon nila ang pagpaduwa tungod kay ang mga teen-agers sa maong mga bata “mag-uyab-uyab.” “Mag uyab uyab na man gud sila so para dili na lang nga mag-uyab uyab sila among gi-separate,” sumala pa ni Patalinghug kinsa niingon usab nga gilikayan sab nila nga ma-“bully” ang mga gagmayng babaye sa mga lalaki ilabi pa dunay pipila nga naa sa sentro nga Child in Conflict with the Law (CICL).

Dili sab tinuod matud pa ni Patalinghug nga gipakaon nila ug expired nga pagkaon ang mga bata hinoon iyang giangkon nga napakaon nila ang maong mga bata ug “chicheria (junkfoods)” nga salin gikan sa City Tourism Office nga ang expiry date October 2019 ug ilang napakaon karung buwana sa Septyembre.

“Katung giingon nila nga expire na nga chicheria hinatag lang pud tu sa amoa sa tourism pwerteng daghana gihatag sa amoa pila ka boxes pero amo gyud tung gi-segregate. Gitan-aw namo nga mga dates kanus-a mu-expire, ang expiry atu October pa man gud pero gipakaon namo karung buwana September, first week sa September.”

Bugtong giangkon ni Patalinghug mao nga nataligam-an niya ang birthday sa usa ka babayeng bata apan matud pa niya nga nangayo na gani siya ug pasaylo sa maong bata nga bag-o lang nahasulod sa sentro.

Sa higayun nga dunay birthday magpahigayun sila ug birthday program unya magluto ug pancit. “Mag pancit gyud mi ana nangayo gani kog sorry sa bata,” matud pa ni Patalinghug. Wala niya isulti kun unsa ang ilang gidalit nga pagkaon adtong higayuna apan matud pa ni Mayor Junard Chan nga nahiubos gyud ang maong bata kay gidalitan lang ug “munggos” nga sud-an.

Gipasabot sab ni Patalinghug nga dili ang tibuok nga P1.5 million nga annual subsidy sa HCC gigahin sa pagkaon ug groceries sanglit lakip nga ilang gigastuhan ang pipila ka operational ug incidental expenses.

Miingon si Patalinghug nga P30, 000 pesos ra ang gihatag nga pondo kaniya alang sa pagkaon ug sa groceries diin mangayo siya ug hulip niini sa ilang main office sa City Social Welfare and Development Office (CSWDO) kun mahurot na kini.

Matud pa ni Patalinghug nga dunay higayun nga tungod sa kalangan sa pag-release sa pondo,.personal nga kwarta na niya ang iyang gamiton ug adto na niya makuha ang bayad sa higayun nga makuha na niya ang treinta mil nga subsidy.

Sila si Patalinghug ug Dihayco gipulihan na nila ni Charito Bering ug Raquel Montebon samtang gipaimbestigar na ni Mayor Chan ang pasangil batok ni Patalinghug ug Montebon ug kun dunay igong basehanan, pasakaan niya ug kaso ang duruha. /AAJ

 

Ang kanhi hepe sa Lapulapu Homecare Center for Children nga si Leticia Patalinghug

 

Si Assistant HCC head Virginia Dihayco kinsa gipulihan na uban sa iyang hepe nga si Leticia Patalinghug

Leave a Reply

Your email address will not be published. Required fields are marked *