Lee ug Sorongon mipatigbabaw sa Milo Marathon 

Bulhot na! Mga participante sa 5K Run sa 43rd Milo Marathon Cebu Elimination, misugod na sa padagan atol sa pagbuto timaan sa pagaugod na sa lumba sa ilang category. Gihimong lima ka hugna ang pagbuhi sa mga runners tungod kay sobra sa 20 mil ang nagpalista ubos sa 5K race. (Hulagway kuha ni Christian Maningo)

Share this on Social Media

CEBU CITY, Philippines – Bisan pa man sa personal nga kakulian o sa makutas nga agianan gipamatud-an sa mga kampyon nga walay makababag sa ilang tinguha nga  kab-oton ang matam-is nga kalamposan sa laing kabuntagon nga ang lunhaw’ng talan-awon sa misugat sa kinabag-ang Sugbu-anon.

Gipamatuod nilang Prince Joey Lee ug Ruffa Sorongon nga ang personal nga kalisdanan dili babag aron dominahon ang Men’s ug Women’s 21K race sa 43rd Milo Marathon Cebu Elimination nga gitapos sa Cebu City Sports Center.

Si Lee milabang sa finish line sa oras nga 1 ka oras, 11 minutes ug 59 segundos bisan pa kon gilisdan kini sa rota sa lumba aron dag-on ang Men’s Division title.

“Lisod kaayo ang rota, daghang tungason labi na gyud gikan sa SM padung sa Salinas Drive.  Galisod gyu ko. Pero pasalamat gyud gihapon ko sa Ginoo sa gihatag niya nako nga kusog. Wala man nako nakuha akong target nga sub 1:10 (usa ka oras ug 10 minutos), pero dili nako makalimtan pagpasalamat, apil na sa akong mga supporters,”  tug-an ni Lee sa iNews.Ph.

 

Prince Joey Lee

Wala pa masipyat si Lee sa pag-apil  sa Milo Marathon sukad pa sa nag-edad pa kini og 3 anyos. Ug karon nga 22-anyos na kini ug gradwado na sa kursong BS Computer Engineering sa University of Cebu, iyang gitinguha nga malabwan ang iyang personal record nga 1:09:58 nga iyang nakuha sa imaging tuig ra usab nga Milo Marathon elimination didto sa Iloilo City.

“Sayon ra to sa Iloilo kay flat kayo ilang rota, naa man gani tungason gamay ra kayo. Pero bisan pa man, malipayon gihapon kaayo ko nga nidaug ko og naka-qualify ko sa National Finals. Mag-training ko og maayo aron akong mabawi ang bati nako nga performance last year sa National Finals,” dugang pa ni Lee, kansang tuong kamot naggakos sa iyang hinigugma nga si Arienne dela Cerna samtang ang walang kamot nagbitbit sa tropeyo ug mga premyo iyang pagdaug.

Layo-layo ang biya ni Lee sa second placer nga si Ariel Saballa kinsa mitapos sa lumba sa oras nga 1:14:29 samtang ang third placer nga si Florendo Lapiz na orasan usab og 1:41:16.

Samtang si Ruffa Sorongon and defending champion sa Women’s Division nakasugat usab og kakulian sa iyang lawas.

Sa dihang pabalik na kini sa finish line, gibati siya og pamoypoy sa iyang tiil samtang nag-alboroto usab ang iyang tiyan.

“Pag-abot nako sa duol sa Robinsons Galleria, lain na kayo akong pamati. Lami na kayo ihunong. Gusto na gyud unta ko modretso sa CR sa duol nga gasoline station. Pero nipadayon lang gyud ko.  Giagwanta lang nako hangtud ako gyud nahuman ang lumba,” pasabot ni Sorongon.

 

Ruffa Sorongon

Wa usab magdahom si Sorongon nga modaug gumikan kay bag-o lang siya nidagan og 42K race sa Manila diin siya midaug isip third placer sa Women’s Division.

Nagpasalamat usab si Sorongon nga nakabiya siya og layo-layo sa nagsunod kaniya nga si Evamie Villarin nga usa ka Ultra Marathoner, aron ma preserbar ang iyang lead.

Gitapos ni Sorongon ang lumba sa oras nga 1:31:31, samtang si Villarin milabang sa finish line sa 1:32:02 ug si  Engiel Estillor ang ikatulo nga finisher diin naorasa kini og  1:41:16.

Ang 10K race gidominar sa mga foreign runenrs. Si Eric Chesikor maoy midaug sa mga lalake sa oras nga 33 minutos ug 38 segundos samtang ang Australiana nga si Melissa Dinneen ang midaug sa mga babaye sa oras nga 41 minutos ug 45 segundo.

Ang manaug uban ni Chesikor mao sila si  Gimar Magdalino (35:35), Jemar Morales (35:53), Edzel John Ardiente (38:11), Oswaldo Arcelo (38:16), Vewin Ochea (39:51), Jemar Maghanoy (39:52), Peter Canumay (40:20), Darwin Tabal (41:32) ug Elison Mejares (41:40). Samtang ang lain pang nitapos sa top 10 sa mga babaye uban ni Dinneen’s mao sila si Cherry Andrin (43:20), April Joy Alampayan (43:38), Karen Manayon (46:00), Mary Joy (47:59), Ezel Conde (49:26), Francesa Pago (50:16), Chiqui Limpangog (52:13), Cherry Mae Celocia (52:31) ug Kisha Delechos (55:29).

Si John Mare Dizon usab ang midaug sa  Male’s 5K race samtang  si Rinmarch Gonzaga ang  second placer ug si  Jessie Abelgos ang third placer. Si  Asia Abucay Paraase, Joan Lovilla Lim and Moira Erediano ang top 3 finishers sa  Female’s 5K competition.

Ang  City Central School ang midaug sa  Elementary Division Cheerdance Competition inubanan sa Don Vicente Rama ES ug sa Mabolo ES; ang Gabriel Jurado Foundation School (GJFS) sa Catmon mipildi sa  University of the Visayas  Minglanilla Campus sa Secondary Division Cheerdance contest samtang ang UV Main Campus nag-inusarang mananaug sa Collegiate Division.

Ang Cebu Technological University (CTU) midaug sa Biggest Delegation title, gisundan sa UV ug sa  Cebu Institute of Technology-University. /RCM

Leave a Reply

Your email address will not be published. Required fields are marked *