NUMERO UNONG NEGOSYANTE SA SUGBU NAPUNGOT SA MCWD

Si OPASCOR President/CEO Tomas Riveral nga misab-it sa pisi ngadto sa bollard sa bag-ong natukod nga finger pier sa OPASCOR sa CIP. Nagunit sa maong pisi sa wala si CCCI President Virgilio "Nonoy" Espeleta

Wala na gyud kapugong sa iyang kaligotgot ang labing taas nga opisyal sa hugpong sa mga negosyante sa Sugbu ngadto sa Metro Cebu Water District (MCWD). Siya mao si Virgilio “Nonoy” Espeleta, Presidente sa Cebu Chamber of Commerce and Industry (CCCI) kinsa mipahungaw gyud kagahapong adlawa sa iyang gibati atul sa iyang mensahe sa pagsubo sa bag-ong natukod nga finger pier sa Oriental Port and Allied Services Corporation (OPASCOR) sa Cebu International Port (CIP).

” Even today I have been complaining that we even don’t have water in the faucet because there is a shortage as far as MCWD supply is concerned. Do you agree with that? So if we say, if we attract more businessmen, these infrastructures have to be there. Water alone is not even – you know is a fundamental commodity. It talks about livability. So that’s another challenge for us,” tipik sa maong mensahe ni Espeleta atubangan sa daghang mga stakeholders sa pantalan nga giinbitar sa OPASCOR sa maong kalihukan.

Sa wala pa siya mudiskurso, ang maong kaligotgot ni Espeleta nahibaw-na sa media human nga mihisgot niini ang Honorary Consul sa Netherlands sa Sugbu nga si Gordon Alan Joseph atul sa usa ka forum kalabot sa tinguhang pagtukod ug Waste To Energy (WTE) diin mitambong usab si Espeleta sa Casino Espanol de Cebu. Ang gitug-an ni Joseph mao nga wala makaligo sa shower si Espeleta kagahapong adlawa gumikan kay walay agas ang ilang tubig kun diin siya nagpuyo.

“I think there is more than one person this morning who woke up with no water to take a shower, one of them is Nonoy Espeleta. And so now he is so pissed off that for the last forty years nothing has been done to solve the water problem,” pamahayag pa ni Joseph kinsa mao usab ang Presidente sa Cebu Business Club. Si Espeleta mitug-an nga wala na gyud siya kapugong kay pila na ka adlaw nga maligo na lamang siya ug mineral water nga iyang gipalit. “Ikaw bay maligo na lang ug mineral water sud na sa lima ka adlaw,” pamahayag pa ni Espeleta nga nagpuyo sa usa sa mga barangay sa Dakbayan sa Sugbu sa dihang gihinabi sa iNews.Ph didto mismo sa kalihukan sa pagsubo sa naasuyng finger pier.

Sa sayo pa, gikastigo usab ang MCWD sa Cebu Provincial Board (BP) ingon man sa mga city councils sa Cebu, Mandaue ug Lapulapu. Giangkon sa pamunuan sa MCWD nga dili gyud paigo ang water supply sa ilang mga kunsumidor ug karung bag-o misamot kini tungod sa nasinati nga kainit sa panahon. Ang Jaclupan dam facility sa Syudad sa Talisay sa MCWD mumenos ang water supply production niini tungod sa maong kahimtang sa panahon. Mismo si PB member Glenn Soco miawhag sa Ombudsman Visayas nga tun-an ang posibilidad nga pasakaan ug kaso ang mga responsable nga mga opisyal sa MCWD tungod sa padayung kakuwang sa supply sa tubig ngadto sa mga kunsumidor.

Giangkon sa hepe sa Corporate Planning Division sa MCWD nga si John Macabenta nga sa Lapulapu City ug sa tibuok Mactan Island, nagkuwang sila ug mga 70, 000 nga cubic meters sa inadlawng demand nga 100, 000 cubic meters. Hinoon kining maong kakuwang maibanan ug mga 3,000 ngadto sa 5, 000 ka cubic meters karung buwana sa hìgayun nga madugangan ang supply nga ilang gipalit gikan sa Mactan Rock. Ang MCWD mitambag sa mga kunsumidor nga magpundo ug tubig sa mga off peak hours arun nga duna silay magamit. Samtang gawas ni Espeleta gidayeg sa ubang local business leaders ang katukoran sa finger pier.

Sumala pa ni OPASCOR Chairman and CEO Atty. Tomas Riveral nga pinaagi sa maong pasilidad mahimo na unyang makadunggo niini ang mga general cargo vessel nga dunay mga bulk cargoes ug ang kadtong mga containerized cargoes adto na sa naandan nga berthing space sa CIP. Maserbisyuhan usab nila ang mga locators sa Mactan Economic Zone (MEZ) diin makarga na ug direkta ug barges ang mga kargamento niini sanglit dunay roll-on, roll-off (Ro-ro) ramp ang maong pantalan.

Mismo si Riveral ang nakahuna-huna sa maong finger pier human nga mitambong siya ug usa ka conference didto sa Rotterdam, Netherlands sa miaging tuig. Ang finger pier migasto ug P1.2 bilyones pesos diin katunga niini pinaagi sa bank loan human usab namuhunan mismo ang OPASCOR ug P600 milyones. Sulod sa 15 ka tuig ila na kining itugyan ngadto sa Cebu Ports Authority (CPA) segun sa ilang nauyunan nga Build Operate and Transfer (BOT) scheme. /AAJ

 

 

Si PRO7 chaplain Fr. Reynaldo Pianar kinsa maoy mi-blessing sa bag-ong natukod nga finger pier sa OPASCOR. Uban ni Pianar si OPASCOR President Atty. Tomas Riveral