P1.2 Billion nga Finger Pier sa OPASCOR, gi-inogorahan

Ang Cebu International Port Finger Pier adunay gilapdon nga 1.25 hectare nga mahimong makaserbisyo sa mga general cargo vessels nga adunay binulto nga karga sama sa bugas, puthaw, semento, asin ug uban pang kargamento nga mahimong idunggo sa maong pasilidad.

Ang maong pantalan makaserbisyo ug duha (2) small/medium nga barko “o” usa ka higanteng barko. Aduna kini yarda nga may gilapdon nga 7,500 square meters. Niining bag-o nga Finger Pier, ang kasamtangang CIP berthing area alang sa mga langyaw nga kargamento gamiton na pagserbisyo sa mga containerized cargoes sanglit mas lapad naman kini karon.

Sa tumoy sa Finger Pier, adunay RORO Ramp nga gidesenyo alang sa mga Roro vessels “o” barge kini isip alternatibo sa pagbyahe sa mga kargamento gawas sa CIP pinaagi sa dagat aron kalikayan ang pagmugna ug trapiko sa kadalanan.

Ang paggamit sa waterway nakitang haum aron makatabang kini pagluag sa traffic grid ug mas mapalambo pa ang port connectivity. Gisugdan pagtukod ang Finger Pier niadtong Septembre 2018 ug natapos kini takdo nga usa ka tuig karon ug mahimo na kining gamiton sa unang simana karong buwan sa Oktobre 2019.

“Cebu has always been an important strategic center for both local and foreign traders which place Cebu ports as one of the busiest ports in the Philippines and i like to say even in Asia”, pagpadayag pa ni Cebu Chamber of Commerce and Industry President Virgilio “Nonoy” Espeleta atol sa inogorasyon.

Upat ka mga P’s ang gitamod ni OPASCOR Chairman and CEO Atty. Tomas A. Riveral, una, ang Pitching kon pagpangita ug pundo, ikaduha, Potential kon mokita ba ang maong proyekto, ikatulo, Passion kon ang determinasyon pagmugna sa maong proyekto ug ang ika-upat mao ang Purpose kon tumong sa maong proyekto, “The purpose that we have is to help make doing business in Cebu easier than in other places”, pagpanapos pa ni Atty. Riveral.

Ang proyekto migasto ug P1.2 Billion, katunga sa pundo pinaagi sa bank financing samtang ang laing katunga gikan mismo sa panudlanan sa OPASCOR. Gitugtan sila nga maka-operate sulod lang sa 15 ka mga tuig ug human sa maong higayon hingpit na unya kining dumalahon sa Cebu Ports Authority nga mao na unya ang manag-iya sa mao nga pasilidad.