BARANGAY MAYORS OFFICE NAA NA SA LAPU-LAPU

Barangay Mayors Office sa Punta Engano, Lapulapu City

Tagurha na karun ang buhatan nga maisip nga barangay hall sa Syudad sa Lapu-Lapu. Kini human nga nagtukod na usab ug Barangay Mayor’s Office (BMO) ang administrasyon ni Mayor Junard “Ahong” Chan.

Ang labing unang gitukod mao ang BMO sa Punta Engano nga gidumala ni Milagros Flores kinsa nagpaila nga mao ang “Barangay Mayor” sa nahisgutang dapit. Gipasabot ni Flores nga bugtong nilang katuyuan mao ang pag-serbisyo sa mga mulopyo sanglit ang mga ayuda sa city hall adto man kanila ipaagi.

“Pag-serbisyo ra gyud ang amoa dinhi Sir. Nakatabang na mi dinhi ug daghan,” segun pa nj Flores dihang nahinabi sa iNews.Ph.

Mitug-an si Flores nga bag-o lang nila natabangan ang mga senior citizens sa Punta Engano samtang karung adlawa, Huwebes, Oktobre 3, 2019, ilang ipahigayun ang mga sakop sa Pantawid Pamilyang Pilipino Program (4P’s) alang sab sa ilang mga ayuda.

Ang konsepto sa BMO nagsugod kini sa Cebu City sa panahon sa administrasyon ni kanhi Mayor Tomas Osmena kinsa naila nga higala ni Mayor Chan. Gawas niining BMO nasayran usab nga dunay mga kanhi department heads sa Cebu City hall nga naa na karun nagtrabaho sa Lapulapu City LGU.

Sa Punta Engano BMO, gawas ni Flores, ila usab nga gipatik si businesswoman Diosaminda “Josie” Hayashi isip Deputy Mayor. Si Hayashi milansar nga city councilor sa Team Libre ni Mayor Chan sa miaging eleksyon sa Mayo apan wala mulampos sa mao niyang tinguha.

Tungod niini gawas sa Barangay Hall nga atua si Kapitan Crisanto Estardo, aduna nay BMO ang Punta Engano. Mayoriya sa mga kapitan sa Lapu-Lapu City dili mga alyado ni Chan apan nahibaw-an nga mga dumadapig ni Congresswoman Paz Radaza, ang kanhi Mayor sa Syudad./AAJ

 

Mao kini si Barangay Mayor Milagros Flores