MGA TAWO NI RADAZA SA OPON GIPANGLABAY SA ISLA SA OLANGO

Ang gawas nga bahin sa Lapulapu Mini City Hall sa Isla sa Olango

Gipangdestino sa Isla sa Olango ni Lapulapu City Mayor Junard Chan ang mga nailang mga tawo ni Congresswoman Paz Radaza. Usa sa mga ilado kaayo mao si Rolando Duero kinsa mao ang Secretary to the Mayor sa pamunuan ni Radaza isip Mayor sa Syudad.

Si Duero kuyog sa lain pang pito ka mga regular nga kawani dihang naabtan sa mga tigbalita sa Lapulapu Mini City Hall sa Barangay Talima. Wala nila gitago ang kasagmuyo nga gipanglabay sila sa isla sukad pa niadtong Hulyo ilabi pa si Duero kinsa mitug-an nga segun sa iyang transfer order siya mao ang musuperbisar sa General Services Office (GSO) apan wala kini mahitabo sanglit wala man mag-operate ang mini city hall.

Si Duero nanghinaot nga si Chan mupabalik niya sa city hall sa mainland sanglit siya man ang “plantilla holder” isip City Government Department Head sa GSO. “Sundon lang siguro niya kung unsay angay buhaton especially sa akoang position ang iyahang istorya sa iyahang transfer order ibutang ko niya diri para to oversee the operation sa GSO sa akong nakita ngari nga wala man mag operate ang mini cityhall, wala man mag operate,”. “Ang ako lang ibalik ko niya sa akong angay nga mabutangan para makatabang sab ko sa iyang administrasyon,” dugang nga pamahayag ni Duero sanglit gitudlo man ni Chan isip hulip niya si Ronald Malacora kinsa mao ang kanhi GSO head sa Cebu City government.

Gawas nga matud pa wala mag-operate ang mini city hall, gikahibulong sab ni Duero nga wala man matuman ang nalatid sa iyang transfer order sanglit si Mayor Chan mitudlo man hinoon ni Carlito Inoc nga maoy muduma sa mga kabtangan sa mini city hall. Si Inoc nga Special Agent sa Office of the City Mayor (segun sa memorandum ni Chan) wala diha sa mini cityhall dihang didto ang mga tigbalita.

Nanghinaot si Duero nga isalikway ni Chan ang pamolitika karung panahuna sanglit nahuman na man ang eleksyon. “I would have been productive sa city makatabang ta sa dispensation of public service kay politics is over. Humana man gud, its time to work,” matud pa usab ni Duero.

Sila si Duero mitug-an usab nga kuyog nila sa mini city hall ang mga giingong mga “volunteers” sa administrasyon ni Mayor Chan taliwala sa wala pag-function sa mini city hall. Sa panahon ni Radaza isip Mayor nag-operate ang mini city hall diin usa sa mga serbisyo niini mao ang pag-isyu ug mga “cedula” apan naundang na kini sa pag-asumir ni Chan.

Dunay opisina ang Mayor ug Bise Mayor sa mini cityhall apan gawas sa lamesa ug mga lingkuranan walay mga staff nga naglihok sa maong mga buhatan. Nalakip sa gipangbalhin sa isla sila si Jerome Jimenez, Bernard Amistad, Joel Arong, Dolly Ranque ug lain pang tulo ka mga kawani kinsa kinahanglan nga mutabok sa lawod sa dagat matag adlaw gikan sa mainland arun sa pag-report sa oras tingtrabaho sanglit pulos man sila nanimuyo sa Lapulapu City mainland./AAJ

 

Si Rolando Duero (naa sa wala) ug mga kaubanan nga kawani nga gipanglabay sa isla sa Olango ni Lapulapu City Mayor Junard Chan

 

Office of the City Mayor sa Lapulapu Mini City Hall sa Olango nga walay tawo

 

Memorandum ni Mayor Chan ngadto ni Special Agent Carlito Inoc isip building administrator sa Lapulapu Mini City Hall