INAHAN SA BATA NGA NAPALGANG PATAY SUD SA AWTO WAY INTERES NGA KASOHAN ANG BUMBERO

Ang patayng lawas ni John Michael Puentenegra (photo courtesy of Radyoman Paul Lauro/DyHP- RMN Cebu)

Share this on Social Media

Walay interes ang inahan sa bata nga mu-file ug kaso batok sa bumbero nga tag-iya sa sakyanan diin didto makita ang patayng lawas sa iyang anak. Kini sumala pa ni Major Christian Torres, ang hepe sa Balamban police station kinsa nangunay sa pag-imbestigar sa maong hitabo niadtong milabayng Sabado, Oktobre 5, 2019, sa Balamban fire station nga nahimutang sa Barangay Santa Cruz sa maong lungsod.

“Tinanong namin kung mag-sasampa ba siya ng kaso doon sa fire officer natin na may ari ng sasakyan eh wala naman siyang, hindi siya willing na mag file ng kaso,” asoy pa ni Torres ngadto sa usa ka Manila based online television reporter uban sa iNews.Ph.

Miluwat si Torres sa maong pamahayag human gimando ni police Regional Director Brig. Gen. Debold Sinas nga subling inbestigahon ang panghitabo nga naglambigit ni Fire Officer 1 Orland Paul Romero sa Balamban fire station.

Ang bata nga si John Michael Puntenegra, 10 anyos nga taga Cambuhawe, Balamban didto makit-i nga patay na sa sulod sa luyong bahin sa Hyundai Accent ni Romero niadtong kahapunon sa maong adlaw, liwas sa fiesta sa maong lungsod. Matud pa ni Torres nga gusto pa unta nila nga i-autopsy ang patayng lawas sa bata apan gilubong na kini sa iyang inahan pagka ugma dayon human sa hitabo.

“Actually pinalibing na niya nga eh, kinabukasan nung ma discover yung patay ang bata inilibing na nya,” dugang pa ni Torres nga nag-Tagalog gihapon segun sa hangyo sa reporter nga si Mitzy Ambrad. Hinoon matud pa ni Torres nga mupahigayun na usab sila ug subling inbestigasyon gumikan sa mando ni General Sinas. Gibutyag ni Torres nga dunay Closed Circuit Television (CCTV) footages nga nakuha ang duha ka mga establismiento nga duol sa fire station ug makatabang gyud kini sa inbestigasyon.

Gitug-an sab hinoon ni Torres nga brown-out atul sa maong hitabo busa posibleng hanap o dili maklaro kung unsa man galing ang diha sa maong footage. Si Torres nanawagan hinoon sa bisan kinsa nga nakasaksi sa maong hitabo nga mupatim-aw arun usab muirog ang dagan sa ilang inbestigasyon.

Nahitabo ang giingong kahibulungan nga pagsulod sa bata sa awto ni Romero nga fiesta sa lungsod ug dihay hikay ug nanag-inom apan miingon si Torres nga segun sa ilang pakig-istorya wala makainom si Romero niadtong tungura kay dili man gani muinom ug ilimnong makahubog ang naasuyng bumbero.

Sumala pa ni Torres nga segun pa ni Romero na lock gyud niini ang mao niyang sakyanan hinungdan nga tanghaga ngano nga nakasulod niini ang bata. Gibutyag sab hinoon ni Torres nga gawas nga ngitngit nagdali ug sulod sa iyang opisina ang bumbero tungod kay nag-uwan sab niadto. /AAJ

 

Si Balamban police station chief Major Christian Torres kinsa nahinabi sa reporter nga si Mitzy Ambrad

 

 

Ang sakyanan ni Romero, diin nakit-an ang patayng lawas sa bata

Leave a Reply

Your email address will not be published. Required fields are marked *