SIGARILYO NGA TAG P200 MATAG STICK GIPALUSOT, EDLAB NAKUGANG NGA CICL SA OPN SECOND CHANCE MGA DRUG SUSPECTS

Si Cebu City Mayor Edgar Labella nakighinabi sa mga residente sa Operation Second Chance.

Share this on Social Media

CEBU CITY, Philippines Gibutyag sa acting director sa Operation Second Chance nga ang paghigpit nga dili na makasulod ang kontrabando maoy dakong hinungdan ngano nga miikyas ang mga residente sa Operation Second Chance.

Lakip na niini matud pa ni retired police Major Ambrosio Ibones mao ang sigarilyo nga labihang kamahal, tag P200 matag stick, P4, 000 ang kaha. “It’s two hundred pesos (P200) per stick, four thousand pesos (P4, 000) per pack. Mao nay ilang kuan ug makapasulod ka dinhi,” mitug-an si Ibones ngadto sa mga tigbalita nga mikuyog ni Mayor Edgardo Labella sa pagduaw sa maong youth rehabilitation center nga gipanag-iya sa kagamhanang lokal nga naa mahimutang sa Barangay Kalunasan.

Matud pa ni Ibones nga pipila ka adlaw sa iyang paglingkod napahunong nila ang pagpayuhot sa maong kontrabando ug uban pang sama niini hinungdan nga gikasuko kini sa mga Child in Conflict with the Law (CICL) nga anaa sa maong sentro. Dili lang mga CICL ang nangasuko dugang pa ni Ibones sanglit apil na ang mga staff sa Second Chance iya sab nga gitaktak human niya masayri nga lakip sab sa maong kahiwian.

Ang maong mga sigarilyo adto sab ipalusot sa sikbit ra nga Bagong Buhay Rehabilitation Center (BBRC), ang Cebu City Jail pinaagi sa paglabay niini ngadto sa usa ka “net” nga dawaton sab ug mga BBRC inmates. Gawas sa pagpayuhot ug sigarilyo gibutyag sab ni Ibones nga duna silay nasakpan nga CICL nga nalakip sa pagpayuhot ug shabu human nila masakmit ang cellphone sa maong bata sa ilang kinalit nga “greyhound operations.”

“Sa akong gipa-impose nga strict implementation sa security sa sulti pa nila sa mga bata wala na silay buhay-buhay. Nahibawo ba ka nga ang transaction sa drugs, ang transaction sa drugs diri,” pag asoy pa usab ni Ibones diin matud pa niya segun sa cellphone text message ang maong CICL gi kontak sa usa ka “drug lord” sa BBRC nga gihatagan ug instruction sa pagbaligya sa shabu ngadto sa gawas.

Ang maong CICL matud pa ni Ibones nisugo usab sa iyang “girlfriend” nga maoy makigtransaksyon ngadto sa drug buyer diin gipahigayun ang deal sa vicinity sa usa ka department store nga nahimutang sa syudad (ngalan sa tindahan gipungan). Lakip sab sa nasuk-an sa mga CICL matud pa ni Ibones mao nga tanang mga “dalaw” ila nang gihigpitan human nga ilang nadiskobre nga dunay ice cream pint nga gipaskan ug pinayuhot nga sigarilyo ingon man junk foods nga butangan ug sigarilyo lakip na gani ang shabu.

“Tungod lagi kay istrikto nami. Ultimo ilang dalaw amo namang, mababaye kag malaki kapkap gyud. Kanang ilang dad-on diri nga pasalubong amo gyud nang tan-awon unya kanang mga junk foods dili na makasulod diri.” Si Ibones gihatagan ug ultimatum nga napulo ka adlaw ni Mayor Edgardo Labella nga mahibalik sa Second Chance ang nahabilin nga lima sa miikyas niadtong Oktobre 4.

“Well, of course, ako siyang gi- warningan di lang ko musulti. There are sanctions that would be imposed of to those custodians, ako lang siyang gitagaan ug higayun,” matud pa sa Mayor.

Biente ka mga CICL ang nakaikyas human nga ilang gihasmagan ang usa ka house parent nga mibukas sa gate apan nahiuli na hinoon ang 15 kanila. Matud pa sa Mayor nga wala man hinoon musulti kaniya ang mga CICL nga gi-maltrato sila ubos sa pagdumala ni Ibones.

Nakugang ang Mayor human niya mahibaw-i nga mayoriya sa mga CICL nag-atubang ug kaso sa pagpayuhot ug ginadiling drugas sagad kanila gikan sa Barangay Duljo Fatima, Ermita ug Labangon, mga notadong dapit sa dakbayan nga dunay illegal drug problem.

“Kasagaran ani nila puro drugs mga 70 to 80 percent mga drug cases unya mga 60 percent Duljo Fatima, Labangon ug Ermita,” matud pa ni Mayor Labella. Si Mayor Labella kinsa midala ug mga packed lunch ngadto sa mga CICL gikan sa usa ka iladong fast food chain miingon nga mupahigayun siya ug anti-drug summit sanglit ang gidangatan sa mga CICL timailhan sa seryuso nga illegal drug problem sa Dakbayan sa Sugbu./AAJ

 

 

Leave a Reply

Your email address will not be published. Required fields are marked *