Ruffa Sorongon: Kampyeon sa Milo, kampyeon sa pagpangga sa ginikanan

Si Ruffa Sorongon, kampyeon sa 21K Female Division title sa 43rd Milo Marathon Cebu Elimination.

Share this on Social Media

CEBU City, Philippines – Luyo sa kalisdanan, mipatigbabaw lang gihapon ang kalamposan gumikan sa  determinasyon inubanan sa hugot nga pag-ampo.

Kini ang gi-pakita ni Ruffa Sorongon, kinsa mao gihapon ang migawas nga kampyeon sa 21K Female Division title sa 43rd Milo Marathon Cebu Elimination niadtong Sep. 29, 2019.

Bisan pa man sa iyang gipamati sukad sa iyang paglabang sa turning point, gitapos gihapon niini ang lumba sa oras nga usa ka oras, 31 minutos ug 31 segondos (1:31:31) aron depensahan ang iyang titulo isip hara sa kababayen-an ug makuha ang luna alang sa National Finals unya sa Enero 2020.

“Gusto na gyud ko mohunong. Lain na kaayo ang akong gipamati sa lawas. Nakakita ko og gasoline station dapit sa may Robinson’s Galleria, lami na gyud kaayong itipas unya magpabuhagay ba,”  sugid ni Ruffa, human niya madawat ang ganti isip mananaug sa lumba.

Wala gyud damha ni Ruffa nga modaug pa siya sa lumba tungod kay gikan lang kini modagan sa usa ka 42K Full Marathon didto sa kaulohan, usa ka semana lang saw ala pa ang Cebu Elimination sa Milo Marathon.

Ruffa Sorongon – file photo ni Christian Maningo

 

“Wa gyud ko magdahum nga modaug pa k okay nisakit na pod ang akong tiil, unya tungason pod baya ang rota gikan sa SM padung na sa Salinas Drive. So ga struggle gyud ko og maayo. Gusto na gyud unta kaayo ko mo quit, pero akong huna-huna gasigi gyud og padayon,” dugang pa sa 28-anyos nga beteranang runner gikan sa Koronadal, South Cotabato.

Unsa ang naghatag og kusog ni Ruffa aron buntogon ang iyang gipamati sa lawas?

Ang iyang pag-pangga sa iyang ginikanan.

Sayo niining tuiga nahospital ang amahan niining si Patrico gumikan sa sakit sa kidney, diin nakinahanglan kini og taas-taas nga medikasyon.

Ning baghoay lang,  na admit usab ang inahan niini nga si Rose Mary tungod sa stroke.

“Dili man kaayo grabe, pero nag numb ang iyang tiil dili maglisod siya og tindog. Runner man pod gud sauna akong mama, unya basin og napasmo ba sa kusog o unsa. Basta under medication pod siya. Kaning akong premyo ako lang pod ni ipadala nila para palit sa ilang tambal. Samtang may kusog pa ko, molumba gyud gihapon ko para sa akong ginikanan,” sumpay ni Ruffa.

Unom ka tuig na nga milabay dihang nagsugod sa pagkulit sa iyang ngalan si Ruffa sa mga lumba dinhi sa Sugbo. Human siya magngahawod sa SOCKSARGEN ug Davao area, nagsugod kini og panimpalad  dinhi sa Sugbo aron maila sa mga lumba.

Tuod man, sa milabay nga upat ka tuig, ni-qualify si Ruffa sa Milo Marathon National Finals diin ang pinakataas niining nahuman ang fourth place overall finish sa imaging tuig.

“Akong paninguhaon nga ma labwan nako ang akong 4th place overall last year. Lisod pa ang pagdaug kay naa pa si Mary Joy (Tabal). Pero paninguhaon nako nga maka top 3 ko para sa akong personal goal ug ang pinaka importante para sa akong ginikanan,” panapos ni Ruffa. /RCM

Mga participante sa 5K Run sa 43rd Milo Marathon Cebu Elimination, misugod na sa padagan atol sa pagbuto timaan sa pagaugod na sa lumba. (Photo by Christian Maningo)

 

 

 

Leave a Reply

Your email address will not be published. Required fields are marked *