ASAWA NI MAYOR CHAN GITAWAG NGA MAYOR 2 NI CONG. PAZ RADAZA

Ang kapikas ni Mayor Junard Chan nga si Cindi King-Chan

Share this on Social Media

“” Mayor 2, mao kana ang tawag ni Cong. Radaza sa kapikas ni Mayor Junard Chan nga si Cindi King-Chan. Gibutyag kini ni Radaza human sab siya mipahibawo nga mipasaka siya ug kaso batok ni Chan kalabot sa congressional office sa Lapulapu City hall kun diin nipahawa na si Radaza human usab nga gi-okupar na kini ni Chan.

Unang gi-pad lock ang maong opisina nga didto pa ang mga staff ni Radaza nga misangpot na gyud sa pagkabakante niini human nga gihipusan ang mga kabtangan sa sulod niini.

Apan matud pa ni Radaza nga mipasaka siya ug kaso gumikan kay dunay ordinansa ang konseho sa syudad nga nagtugot kaniya nga gamiton kini din siya nidugang nga gikawat ang iyang mga kabtangan.

“Gi-padlock nila unya ang guwa ana daghan biya tu ug mga decorative, daghan kung mga butang-butang. Ilang gikawat ang akong mga butang, unsaon ko man na ug term, gikawat gyud kay ako man ang nag-okupar didto unya ilang gipanguha so gikawat nila ang akong mga butang,” matud pa ni Cong. Radaza sa mga tigbalita.

Dinhi na siya nisumpay nga “Mayor 2” ang asawa sa Mayor tungod kay sa iyang nahibaloan kini mao ang mi-okupar sa Mayor’s office samtang ang kadtong congressional office nga didto siya kanhi mao ang opisina sa Mayor. “Ang ako lang nadunggan ug unsay nakit-an sa mga tawo pud, ang katong Mayor’s office diay mao nang nagdali si Mayor Ahong didto sa congressman kay iya diayng asawa ang nag-office didto.

Siya (asawa) ang nag office didto sa Mayor’s office nga giokupahan nako. Dili First Lady, iprubar ninyo nga tua mag-opisina, Mayor 2,” pagbutyag ni Cong. Radaza. Si Mayor Chan mipanghimakak dayon sa maong pamasangil. Makit-an sab gyud hinoon ang presensya sa asawa ni Mayor Chan sa city hall sangkit gitudlo man siya sa Mayor nga sakop sa giumol nga Mactan Quincentennial Committee nga maoy muduma sa umaabot nga 500th year anniversary sa Battle of Mactan sa tuig 2021.

“Congresswoman Paz Radaza suroya diri ang city hall. Ang city hall, kutob sa muanhi nako mao ni, duha ka opisina, kining opisina ug kadto, maglabang-labang ko, kining duha. Mam sayop ka, walay laing nag-occupy ako ra,” matud sa Mayor diha sa video sa Lapulapu City Public Information Office (PIO) sa Facebook.

Ang kaso nga gipasaka ni Cong. Radaza labot sa occupancy sa congressional office nag-ung-ong karun sa usa ka korte sa Dakbayan sa Lapulapu. Samtang gipahibawo sab ni Cong. Radaza nga mukabat sa 7, 000 ka Oponganon ang nakabenepisyo sa work for cash program sa gobyerno diin siya naninguha nga kini mapatuman pinaagi sa Dept. of Labor and Employent (DOLE).

Ang programa gitawag ug Tulong Panghanapbuhay sa Ating Disadvantage/Displaced Workers (TUPAD). Ang programa gipaagi sa mga barangay captains sa syudad diin matag usa maka-sweldo ug P386 matag adlaw.

Tag napulo ka adlaw ang maong emergency employment scheme busa matag usa makadawat ug P3, 860 gawas pa sa group insurance coverage nga tag P100, 000 matag usa.

Ang buhatan ni Cong. Radaza nakakuha ug budget nga P20 milyones sa maong programa wala pay labot sa nakuha niini nga pundo alang sa government intership program (GIP) nga sweldado usab alang sa mga batan-on./AAJ

 

Si Lapulapu Cong. Paz Radaza atul sa orientation sa TUPAD program nga mibenepisyo ug 7, 00O ka Oponganon

 

 

 

Ang asawa ni Mayor Junard Chan nga si Cindi King-Chan nga naa sa luyo sa Mayor ug Bise Mayor Celedonio Sitoy atul sa pagbukas sa kapyestahan sa Lapulapu City niadtong byernes sa gabii. Uban sa hulagway si Konsehal Gregori

Leave a Reply

Your email address will not be published. Required fields are marked *