PUTI NGA VAN PAREHAS NGA GISAKYAN SA MGA MI-PUSIL UG MGA MAYOR DINHI SA SUGBU

Ang white van nga lakip sa back-up vehicle sa polis sa dihang gi-ambush si kanhi Mayor David Navarro

Share this on Social Media

Pulos mga nagsakay ug “kolor puti nga van” ang mga namusil ug mga Mayor dinhi sa Sugbu. Usa kini karun nga gitan-aw nga anggulo sa National Bureau of Investigation (NBI) nga mao na karun ang miimbestigar sa pag-ambush ni Clarin Misamis Occidental Mayor David Navarro.

“We are trying to look into it because the pattern looks the same. Coincidence or what, the fact is, in all three instances, a white van has been used,” segun sa usa ka NBI source nga nahinabi sa iNews.Ph.

Gipasabot sa maong source nga gawas sa hitabo ni Mayor Navarro niadtong Octobre 25, puti usab nga van ang gisakyan sa mga nipusil patay ni anhing Ronda Mayor Mariano “Noni” Blanco niadtong Septembre 5, 2018 ingon man niadtong Mayo 13, 2018 diin sakay sab ug puti nga van ang mga nirakrak ni kanhi Daanbantayan Mayor Vicente Loot.

Sila si Navarro, Blanco ug Loot pulos nahilakip sa “narco-list” ni Presidente Rodrigo Duterte apan sa nahitabo ni Navarro iyang gimanduan ang NBI nga mao ang mupahigayun sa inbestigasyon human siya natahap nga posibleng mga polis ang mipatay ngadto sa maong Mayor.

“Ano ang ginawa ng PNP? Baka sila ang pumatay. Eh sila yung malapit. To make it really fair, I’d like to order the police to terminate their investigation and hand it to the NBI whatever documents and or proof or evidence that they have in their hand,” nagkanayon si Pres. Duterte.

Wala ra hinoon maunsa si Mayor Loot apan nasamdam ang iyang driver-bodyguard ug usa ka katabang human sila girakrakan dihang nanganaug sa ilang gisakyan nga pumpboat didto sa Maya port sa Daanbantayan.

Bisan tuod ug sentro sa inbestisgasyon ang nahitabo ngadto ni Navarro buot sayron sa NBI kun ang mga namusil usa ra ba ka grupo. “We would like to know if there is a connection in all three,” matud pa gihapon sa maong tinubdan gikan sa NBI.

Ang inbestigasyon ngadto sa kamatayon ni Blanco nga gisaka sa iyang opisina samtang natulog wala gyud matino kun kinsa ang mga mipatay kaniya ingon man usab sa kang kanhi Mayor Loot, wala gyud maila kun kinsa ang mga responsable sa pagpangrakrak.

Sa sayo pa girelibuhan na sa iyang katungdanan ni Police Regional Office (PRO7) director Brig. Gen. Valeriano De Leon ang hepe sa Cebu City Police Office nga si Col. Gemma Vinluan nunut sa maong pag-ambush ni Navarro.

Sa wala pa siya marelibuhi ni Col. Giovani Maines, gipaniguro ni Vinluan nga dili sakop sa Cebu City Police Office ang mga mipusil patay ngadto ni Navarro. Sa kaso ni Navarro, gihuptan na karun sa NBI ang spot report nga nagtumbok nga nagsakay ug puti nga van ang mga namusil kaniya taliwala nga duna siyay mga police escorts.

Matud pa sa maong report nga labing menos lima ka mga tawo nga nagtaptap sa nawong ang mga namusil ngadto ni Mayor Navarro. Paingon unta sa Cebu City Prosecutors Office sa M. Velez Street ang maong police convoy dihang nahitabo ang pagpatay sa kanhi Mayor sa Clarin.

Pasakaan unta ug kasong acts of lasciviousness, physical injury ug usurpation of authority si Navarro kinsa gitumbok nga namun-og ug usa ka masahista nga lalaki human balibari nga walay babayeng masahista nga makaatiman kaniya.

Dihang gipasundan ug babayeng masahista sa iyang hotel room sa Fuente Osmena mireklamo ang masahista nga gipaogay na hinoon siya sa kinatawo sa Mayor nga sumala pa nagpailang usa ka polis niadtong higayona.

Gidakop si Navarro didto sa Mactan Airport ug diha na sa poder sa mga polis sa Abellana police station dihang nahitabo ang pag-ambush kaniya samtang paingon na unta sila sa piskaliya arun ipasaka ang mga kaso. Gilambigit sab hinoon si Navarro sa Ozamiz City robbery group nga maoy suspetsado sa P136 milyones nga tulis sa JCentre Mall niadtong Oktobre 19./AAJ

 

tipik sa police report sa ambush ni Mayor David Navarro

 

 

 

mug shot photo ni kanhi Mayor David Navarro

Leave a Reply

Your email address will not be published. Required fields are marked *