Puwa nga tubig sa Ozamiz City.

OZAMIZ CITY – Nakurat ang mga katawhan sa pipila ka mga barangay nga nahimutang sa baybayon niining syudad sa kalit nga pagpula sa tubig dagat pasado alas 3 sa hapon, Pebrero 21, 2021.

Dako nga kabalaka ang nasinati karon sa mga seaweed farmers ug mga mangingisda sa posibleng epekto sa ilang gitanom nga guso o sa mga makuha nga isda sa baybayon.

Dali hinoon kini nga gi-aksyonan sa mga tinugyanan sa Philippine Coast Guard, PNP Maritime ug sa Bureau of Fisheries and Aquatic Resources (BFAR), diin mikuha kini og sample sa tubig ug ipailawom sa laboratory examination.

Apan adunay pipila nga nagtuo nga posibleng resulta kini sa nag-leak nga produktong lana. Lakip sa nakasinati sa pagpula sa tubig dagat mao ang Barangay Triunfu, Carmen Annex, area sa Santa Cruz ug San Roque.

Una nang gitataw ni Eliza Pedrase, kanhi tinugyanan sa Fisheries Division sa Ozamiz City Agriculture Office nga aduna nay nahitabo nga susamang insidente sa baybayon sa Ozamiz apan dili kini red tide. Matud pa, anod kini dala sa barko nga magbyahe ug modunggo sa pantalan.

Nasayran nga kini na ang ikaduhang higayon nga nahitabo sa dagat sa Ozamiz City.

 

 Rechie R. Brusas